జగన్ ను నమ్ముకున్నందుకు రైతులు మరణశాసనం రాసుకుంటున్నారు
రైతులకు న్యాయం జరిగేవరకూ టిడిపి అండగా వుంటుంది
బాధితుల పరామర్శకు సిఎం ఎందుకు రావటం లేదు?
గోనెసంచుల్లో కమిషన్ లు కొట్టేసిన పందికొక్కులు ఎవరు?
పంట నష్టం వివరాలు వీడియో తీసి సోషల్ మీడియాలో పెట్టాలి
ఉంగుటూరు, తాడేపల్లిగూడెం, తణుకు నియోజకవర్గాల్లో చంద్రబాబు తొలిరోజు పర్యటన
రైతులు స్మశానంలో ధాన్యం ఆరబెట్టుకోవటం జగన్ రెడ్డి చేతకాని పాలనకు నిదర్శనం. బాద్యత లేని ముఖ్యమంత్రి రాష్టానికి అవసరమా? అని తెలుగుదేశం పార్టీ అధినేత నారా చంద్రబాబు నాయుడు ప్రశ్నించారు. జగన్ ని పాలనలో కౌలు రైతుల ఆత్మహత్యల్లో దేశంలో రెండో స్ధానంలో ఉన్నాం, జగన్ ని నమ్ముకున్నందుకు రైతులు మరణం శాసనం రాసుకుంటున్నారు. సీఎం వచ్చి రైతులను పరామర్శించాలి, ధాన్యం ఎప్పటిలోగా కొనుగోలు చేస్తారో నిర్టిష్టమైన సమాధానం చెప్పాలి. ప్రతి రైతుకు న్యాయం జరిగేవరకు టీడీపీ అండగా ఉంటుంది అని చంద్రబాబు వెల్లడించారు. ఉంగుటూరు, తాడేపల్లి గూడెం, తణుకు నియోజకవర్గాల్లో అకాల వర్షాలకు దెబ్బతిన్న పంటలను చంద్రబాబు గురువారం పరిశీలించారు.
ఈ సందర్భంగా రైతులు చంద్రబాబు ఎదుట తాము పడుతున్న కష్టాలు వివరించి కన్నీటి పర్యంతం అయ్యారు. రైతుల కష్టాలు చూసి చలించిన చంద్రబాబు, వారికి తానున్నాను అంటూ భరోసా ఇచ్చారు. ఈ సందర్భంగా చంద్రబాబు రైతుల నుద్దేశించి మాట్లాడుతూ అకాల వరదల కారణంగా వరి రైతులు తీవ్రంగా నష్టపోయారన్నారు. 70 శాతం ధాన్యం ఇంకా పొలాల్లో ఉంది. అసమర్ద సీఎం వల్ల నిండా మునిగిపోయామని రైతులు వాపోతున్నారని చెప్పారు. జగన్ రెడ్డి అసమర్ద పాలనతో రైతుల జీవితాల్ని నాశనం చేస్తున్నారు. ప్రభుత్వ నిర్లక్ష్యం వల్ల రైతుల కష్టాన్ని రైస్ మిల్లర్లు, దళారులు తోచుకుంటున్నారు. తరుగు, తేమ అంటూ డబ్బుల్లో కోత కోస్తున్నారని ఆరోపించారు.
ఎకరాకు 60 బస్తాలు పండుతాయి, కానీ కేవలం 53 బస్తాలే కొంటారంటున్నారు, మరి మిగిలిన దాన్యం ఎవరు కొనాలి? నేను వస్తున్నాని తెలిసి ఇప్పుడు హడావుడి అధికారులు దాన్యం కొనుగోలు అంటూ డ్రామాలాడుతున్నారు. మరి మిగతా గ్రామాల్లో ధాన్యం పరిస్ధితి ఏంటి? ఏప్రిల్ మెదటి వారంలోనే దాన్యం సేకరణ చేసి ఉంటే ఈ పరిస్ధితి ఉండేదా? అని పశ్నించారు. వరద బాధితులను పరామర్శించేందుకు సీఎం ఎందుకు రావట్లేదు? రైతులు కష్టాల్లో ఉంటే మంత్రులు, ఎమ్మెల్యేలు ఏం చేస్తున్నారు? అని చంద్రబాబు ధ్వజమెత్తారు.
చినిగిపోయిన గోనె సంచులు ఇస్తారా?: చంద్రబాబు
గోనె సంచులు ఇవ్వలేని అసమర్థ ప్రభుత్వాన్ని ఏమని చెప్పాలి. గోనె సంచుల్లో కమిషన్లు కొట్టేసిన పంది కొక్కులు ఎవరు? చినిగిపోయిన గోనె సంచులు ఇస్తారా? అని చంద్రబాబు తీవ్రస్థాయిలో ఆగ్రహం వ్యక్తం చేశారు. పంటల పరిశీలన అనంతరం చంద్రబాబు మీడియాతో మాట్లాడారు. ఈ జిల్లాకు 2 కోట్ల గోనె సంచులు రావాలి. కానీ 20 లక్షల గోనె సంచులు మాత్రమే వచ్చాయి. మళ్లీ తుఫాను ఉందనే హెచ్చరికలు వస్తున్నాయి. రైతుల్ని ఎప్పుడు ఆదుకుంటారు అని ప్రశ్నించారు. అకాల వర్షాలకు రైతులు తీవ్రంగా నష్టపోయారు. తమ సమస్యలు చెప్పుకున్న రైతులను ప్రభుత్వం బెదిరిస్తుంది. కరోనా కాలంలో సైతం పనిచేసి దేశానికి అన్నం పెట్టిన రైతును కూడా ప్రభుత్వం ఇబ్బంది పెడుతుంది అని ఆవేదన వ్యక్తం చేశారు.
ఉభయ గోదావరి జిల్లాలో 40 లక్షల మెట్రిక్ టన్నుల ధాన్యం వస్తుంది. ఆ ధాన్యం అంతా ఎప్పుడు కొంటారు. అకాల వర్షాలపై రైతులను ఎందుకు అప్రమత్తం చెయ్యలేదు. ఏప్రిల్ 1వ తేదీ నుంచి ధాన్యం సేకరణ ప్రారంభం కావాలి. కానీ అవ్వలేదన్నారు. రైతులకు ఇచ్చే గోనె సంచులు కూడా ఇవ్వలేదు. చిరిగిపోయిన సంచులు ఇచ్చారు. ఒక రైతు తన సొంత డబ్బు రూ.25 వేలు లారీకి చెల్లిస్తే తప్ప ఆయన ధాన్యం మిల్లు స్వీకరించలేదు. మిల్లర్లు నూక వస్తుందని రూ.80 నుంచి రూ.140 రూపాయలు రైతు నుంచి తీసుకుంటున్నారు అని ఆరోపించారు. ఒకప్పుడు నచ్చిన విధంగా ధాన్యం తరలించే అవకాశం రైతులకు ఉండేది, నేడు ఆ విధానాన్ని తీసేశారు. మిల్లుల దగ్గర వెయిట్ చేయాల్సి వస్తే దానికీ పెనాల్టీ రైతుల నుంచి వసూలు చేస్తున్నారు అని ఆవేదన వ్యక్తం చేశారు.
ప్రభుత్వ విధానాల వల్ల రైతుకు ఎకరానికి రూ.20 వేల నుంచి రూ. 30 వేలు నష్టపోతున్నాడు. తన నియోజకవర్గంలో ఉండే రైతుల గురించి పట్టించుకోని సివిల్ సప్లై మంత్రి ఎందుకు? అని విమర్శించారు. రైతులు కష్టాలకు భయపడి ఆత్మహత్యలు చేసుకోవద్దు. పోరాడుదాం. పోరాడితే పోయేది ఏమీ లేదు అని పిలుపునిచ్చారు. నేను పర్యటనకు వస్తాను అని చెప్పి లారీలు తెచ్చి ధాన్యం తరలించే ప్రయత్నం చేశారు. నేను వస్తాను అని చెప్పి ఉంటే దువ్వలో కూడా ధాన్యం ముందే తరలించే వారు. సిఎం అమరావతిలో కూర్చుని ఏం చేస్తున్నాడు. రైతుకు ఇంత కష్టం వస్తే ఎందుకు కదలడం లేదు. రైతుల దగ్గరకు జగన్ రావాలి. వారి కష్టాలు చూడాలి అని చంద్రబాబు డిమాండ్ చేశారు.
భోగాపురానికి రెండో సారి ఫౌండేషన్ వేయాల్సిన అవసరం లేదు. ముందు మీరు రైతుల కష్టాలు చూడండి అని చంద్రబాబు పేర్కొన్నారు. నాడు ప్రజలు ఓట్లు వేసింది మీ అధికారులకు కాదు. మీకు. నాడు ఓట్లు వేయించుకుని ఇప్పుడు ఎక్కడ దాక్కున్నారు అంటూ ధ్వజమెత్తారు. బస్తాకు రూ. 1530 రూపాయలు మద్దతు ధర ఇచ్చి తీరాలి. గోనె సంచులు ఇవ్వలేని అసమర్థ ప్రభుత్వాన్ని ఏమని చెప్పాలి గోనె సంచుల్లో కమిషన్లు కొట్టేసిన పంది కొక్కులు ఎవరు? అని ఆగ్రహం వ్యక్తం చేశారు. ఈ జిల్లాకు 2 కోట్ల గోనె సంచులు రావాలి. కానీ 20 లక్షల గోనె సంచులు మాత్రమే వచ్చాయని చెప్పారు. ధాన్యం అమ్మే రైతులకు డబ్బులు ఇవ్వకపోగా… వారినే ఎదురు డబ్బులు కట్టమని అడుతున్నారు.
రైతులు గళం ఎత్తితే వారిపైనా కేసులు పెడుతున్నారు. భయపడాల్సిన అవసరం లేదు. నేడు అండగా ఉంటాను. రైతుల సమస్యలు తీరే వరకు నేను ఇక్కడి నుంచి పోను అని చంద్రబాబు వెల్లడించారు. కొత్త కొత్త నిబంధనలు పెట్టి రైతులను ఇబ్బందులు పెడుతున్నారు. బస్తా ధాన్యానికి మద్దతు ధర గా రూ.1530 ఇవ్వాల్సిందే. రైతుల ధాన్యం చివరి బస్తా కొనేవరకు తెలుగు దేశం పార్టీ ఉంటుంది. ప్రభుత్వ మెడలు వంచి అయినా వీరికి న్యాయం చేస్తామని హామీ ఇచ్చారు. మొక్క జొన్న, పసుపు, వాణిజ్య పంటలకు జరిగిన నష్టానికి ప్రభుత్వం పరిహారం ఇవ్వాలి. రైతులు తమకు జరిగిన నష్టం వీడియో తీసి మీడియాలో, సోషల్ మీడియాలో పెట్టండి. మీరు భయపడితే నాకు పెట్టండి అని చంద్రబాబు సూచించారు.
ఈ జిల్లాలో ఉన్న ఎమ్మెల్యేలు, మంత్రులు ఎందుకు తిరగడం లేదు. ఈ సైకోలు ఏం చేస్తారు? కేసులు పెడతారు. భయపడతామా? అని ప్రశ్నించారు. మంత్రి సొంత నియోజకవర్గంలో గోనె సంచుల కోసం రైతుల ఆందోళన చేయటం సిగ్గుచేటు, దీనికి ఏం సమాధానం చెపుతారన్నారు. రైతుల్లో ఎంతో బాధ ఆవేదన ఉంది. ఇంత సమస్య ఉన్నా సిఎం కనీసం ఒక్క ప్రకటన చేయరు. ఈ ప్రభుత్వాన్ని దోషులుగా ప్రజా కోర్టులో నిలబెడదాం అని చంద్రబాబు పిలుపునిచ్చారు.
