మళ్ళీ వస్తా .. నా పోరాటం చూపిస్తా : ప్రభుత్వానికి చంద్రబాబు హెచ్చరిక

అకాలవర్షానికి దెబ్బతిన్న పంటపొలాల సందర్శన
ఏపిలో దళారుల రాజ్యం
ఆర్బికే వ్యవస్థ ఏమైంది?
ధాన్యం రైతులకు న్యాయం జరిగేవరకూ పోరాటం ఆగదు
8 నియోజకవర్గాల్లో పంటపొలాల సందర్శన
ఏకరాకు రూ. 25 వేలు పరిహారం ఇవ్వాలి

రైతులు భయపడి ఆత్మహత్యలు చేసుకోవద్దు , మీకు అండగా నేనుంటా ప్రభుత్వంపై పోరాడదాం. 72 గంటల డెడ్ లైన్ అయ్యాక మళ్లీ నేను వస్తా. అప్పట్నుంచి పోరుబాటే, 72 గంటల తర్వాత నా పోరాటం ఎలా ఉంటుందో వైసీపీ ప్రభుత్వానికి చూపిస్తా అని తెలుగుదేశం పార్టీ అధినేత నారా చంద్రబాబు నాయుడు హెచ్చరించారు. నిడదవోలు నియోజకవర్గం లోని కాట కోటేశ్వరం, సమిస్త్రిగూడెం లలో అకాల వర్షం కారణంగా దెబ్బతిన్న పంటపొలాలను చంద్రబాబు శనివారం సందర్శించారు. పంటపొలాలను పరిశీలించిన అనంతరం చంద్రబాబు రైతులను ఓదార్చారు. ఈ సందర్భంగా చంద్రబాబు మాట్లాడుతూ ప్రభుత్వంపై తీవ్రస్థాయిలో విరుచుకుపడ్డారు.

పేద రైతులు, కౌలు రైతులంటే జగన్ కి లెక్క లేదు, అహంభావంతో ప్రభుత్వం వ్యవహరిస్తోంది. ప్రభుత్వం మెడలు వంచైనా రైతులకు న్యాయం చేయించే బాధ్యత నాది, రైతులు ఐక్యమత్యంగా ఉంటేనే న్యాయం జరుగుతుందన్నారు. రైతులు భయపడి ఆత్మహత్యలు చేసుకోవద్దు , మీకు అండగా నేనుంటా ప్రభుత్వంపై పోరాడదాం అంటూ భరోసా ఇచ్చారు. రైతుల ముందు నేనుంటా అరెస్ట్ చేస్తే నన్ను చేయనివ్వండి అంటూ సవాల్ చేశారు. ఏపీలో దళారుల రాజ్యం నడుస్తుంది. రైతు దగా ప్రభుత్వమే ఇది అని ధ్వజమెత్తారు. ప్రభుత్వ వైఫల్యమే రైతుల పట్ల శాపంగా మారింది. దళారులు దోచుకుంటున్నారని రైతులు ఆవేదన వ్యక్తం చేస్తున్నారన్నారు. భారీ వర్షాల వల్ల ధాన్యం రైతులు బాగా నష్టపోయారు, తడిసిన ధాన్యాన్ని అధికారులు కొనుగోలు చేయడం లేదు.

ధాన్యం పొలం నుంచి నేరుగా రైస్ మిల్ కు వెళ్లాలి, సంచులు లేక ధాన్యం పొలంలోనే తడిసిపోయాయి. ప్రభుత్వ వైఫల్యం వల్లే ధాన్యం రైతులు నష్టపోయారు, పంటంతా నీట మునగడం వల్ల పరిహారం ఇవ్వాలని రైతులు కోరుతున్నారని చెప్పారు. నిబంధనల పేరుతో రైతులను ఇబ్బందులు పెడుతున్నారు, ఆర్బీకే వ్యవస్థ ఏమైంది? సైకో జగన్ చెప్పాలి అని డిమాండ్ చేశారు. ధాన్యం రైతులకు న్యాయం జరిగేవరకు పోరాటం ఆగదు, మా పంట మునిగింది. పరిహారం ఇవ్వాలనే నినాదంతో ఆందోళనలు నిర్వహిస్తామని వెల్లడించారు. మంత్రులు సొల్లు కబుర్లు ఆపి ధైర్యముంటే రైతుల దగ్గరకు రావాలి అని సవాల్ చేశారు. సీఎం క్షేత్రస్థాయికి వస్తే వాస్తవాలు తెలుస్తాయన్నారు.

తాడేపల్లి కొంపలో కూర్చుంటే వాస్తవాలు తెలియవు, నేను వచ్చాక రైతులకు గోనె సంచులు పంపారని చెప్పారు. రైతులకు ధైర్యం ఇవ్వడానికే నేను వచ్చా, పోలీసులు బ్యాడ్జ్ లు పెట్టుకోకుండా వచ్చి రైతులను బెదిరిస్తున్నారని ఆరోపించారు. రైతులకు దైర్యంగా నేను నిలబడతా, రైతులకు న్యాయం జరిగే వరకూ వారి తరపున పోరాడతానని వెల్లడించారు. రైస్ మిల్లర్లు సీఎం ఒత్తిడికి లోనై రైతులను ఇబ్బంది పెట్టొద్దు, రైతులను ఇబ్బంది పెడితే రైస్ మిల్లర్లు జైలుకు వెళ్లక తప్పదు. డబ్బులు తీసుకున్న మిల్లర్లపై అన్ని పోలీస్ స్టేషన్లలో కేసులు పెడతాం, పోలీసులు కేసు తీసుకోకపోతే ప్రైవేట్ కేసు వేస్తామని హెచ్చరించారు.

ఉభయ గోదావరి జిల్లాల్లో మూడు రోజుల్లో 8 నియోజకవర్గాల్లో పర్యటించాను. రైతుల కష్టాలు, బాధల్ని చూశానని చంద్రబాబు చెప్పారు. ఆర్బికె నిబంధనల ప్రకారం పనిచేస్తుందా లేదా? సిఎం చెప్పాలి, నిబంధనలు అమలు అయితే రైతులు మిల్లుకు డబ్బు ఎందుకు కట్టాలి? ఎందుకు టోల్ ఫ్రీ నెంబర్ పనిచేయడం లేదు అని ప్రశ్నించారు. మిల్లర్లు ట్రాక్టర్ కు 20 వేల రూపాయలు కూడా కట్టించుకుంటున్నారు. రైతుల నుంచి డబ్బులు వసూలు చేస్తున్న మిల్లర్లపై ఎందుకు కేసులు పెట్టలేదు.మిల్లర్లు వసూలు చేసిన డబ్బు తాడేపల్లి ప్యాలెస్ కో పోతుంది. అందుకే వారిపై కేసులు పెట్టడం లేదు అని ఆరోపించారు.

ఆర్బికె సెంటర్ లో మొన్నటి వరకు ఆన్ లైన్ అన్నారు. మళ్లీ ఆఫ్ లైన్ అంటున్నారు. అందుకే తుగ్లక్ పాలన అనేది అని విమర్శించారు. ఏ తప్పు చేయని ఆదిరెడ్డి అప్పారావుపై కేసుపెట్టిన ప్రభుత్వం, రాజమండ్రి సూపరింటెండెంట్ పై చర్యలు తీసుకున్న ప్రభుత్వం తప్పు చేసిన రైస్ మిల్లర్ల పై ఎందుకు చర్యలు తీసుకోలేదు? అని ప్రశ్నించారు. మద్దతు ధర రూ. 1530 ఎందుకు ఇవ్వడం లేదు? రైతుల నుంచి కొట్టేసిన డబ్బు ఎవరి జేబుల్లోకి వెళ్తుందో తేలాలన్నారు. నేడు రైతు, కౌలు రైతు నాశనం అయ్యారు. ఏప్రిల్ 1 నుంచి ఎందుకు ధాన్యం సేకరించలేదు. సంచులు ఎందుకు సిద్దం చేయలేదు.

తెలుగు దేశం ప్రభుత్వంలో ఎప్పుడూ ఇలాంటి సమస్య రాలేదు, నాడు అక్రమాలకు పాల్పడితే రైస్ మిల్లర్లు సహా అందరినీ అరెస్టు చేశామని చెప్పారు. సివిల్ సప్లై కార్పొరేషన్ గా భాస్కర్ రెడ్డి. మిల్లర్స్ అసోసియేషన్ అధ్యక్షుడు ఆయన కొడుకు, ఇంకో కొడుకు ఎమ్మెల్యే. వీరంతా కలిసి రైతుల్ని దోచుకుంటున్నారని ఆరోపించారు. జగన్ పెళ్లిళ్లు, పేరంటాల్లో బిజీ గా ఉన్నాడు. రైతులు పట్టడం లేదని విమర్శించారు. ప్రభుత్వం బస్తాకు రూ.1530 ఇచ్చి తీరాలి. పొలంలో ఉండే పంటకు బీమా చేయించలేదు. దీంతో రైతులునష్టపోయారని చెప్పారు. వరి పంట నష్టపోయిన రైతుకు ఎకరాకు రూ.25 వేలు నష్టపరిహారం ఇవ్వాలి, మెక్కజొన్నకు కూడా ఎకరాకు రూ.25 వేలు ఇవ్వాలి అని డిమాండ్ చేశారు.

రైతులు ఏం నష్టపోయారో వీడియోలు తీసి పంపండి. ఈ ప్రభుత్వం నష్టపరిహారం ఇచ్చేలా ఒత్తిడి తెద్దాం, వాళ్లు ఇవ్వకపోతే, టీడీపీ ప్రభుత్వం వచ్చాక నష్టపరిహారం ఇస్తామని వెల్లడించారు. పాడైన ధాన్యం సేకరించకపోతే, జగన్ ఇంటికి ఈ ధాన్యం పంపుదాం. ఆయన ఎలాగూ బయటకు రాడు. మనమే అక్కడికి ఈ ధాన్యం పంపుదాం అని చెప్పారు. 72 గంటల్లో ప్రభుత్వం మొత్తం ధాన్యం కొనుగోలు చేయకపోతే పోరుబాట కార్యక్రమం నిర్వహిస్తామని చంద్రబాబు హెచ్చరించారు.