- స్థానిక ఎన్నికల్లో విజయమే లక్ష్యంగా సమష్టిగా పనిచేయాలి
- పదవుల కోసం విభేదాలు వద్దు, అధిష్ఠానం నిర్ణయమే శిరోధార్యం
- బందరు పోర్టు, గోవా షిప్ యార్డ్తో మారనున్న మచిలీపట్నం రూపురేఖలు
- ప్రభుత్వ అభివృద్ధి, సంక్షేమ కార్యక్రమాలను ప్రతి ఇంటికీ వివరించాలి
- కూటమి నాయకుల సమావేశంలో మంత్రి కొల్లు రవీంద్ర
మచిలీపట్నం (చైతన్యరథం): రానున్న స్థానిక సంస్థల ఎన్నికల్లో కూటమి విజయమే లక్ష్యంగా నాయకులు, కార్యకర్తలు సమష్టిగా పనిచేయాలని రాష్ట్ర ఎక్సైజ్, గనులు, భూగర్భ వనరుల శాఖ మంత్రి కొల్లు రవీంద్ర పిలుపునిచ్చారు. ఈ నెల 30 నుంచి ప్రారంభమయ్యే ‘ఇంటింటికీ కూటమి ప్రభుత్వం’ కార్యక్రమాన్ని విజయవంతం చేయాలని, ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రతి ఇంటికీ తీసుకెళ్లాలని సూచించారు. మచిలీపట్నంలో మంత్రి కొల్లు రవీంద్ర ఆధ్వర్యంలో సోమవారం కూటమి నాయకుల సమావేశం నిర్వహించారు. ఈ సందర్భంగా మంత్రి మాట్లాడుతూ.. రానున్న స్థానిక సంస్థల ఎన్నికల్లో కూటమి అభ్యర్థుల విజయానికి ప్రతి ఒక్కరూ కృషి చేయాలని కోరారు. ప్రభుత్వం అమలు చేస్తున్న అభివృద్ధి, సంక్షేమ కార్యక్రమాలను ప్రజలకు వివరించి, వాటి ప్రయోజనాలను ప్రతి కుటుంబానికి చేరేలా చూడాలన్నారు.
పార్టీలో పదవుల కోసం ఎవరూ విభేదాలకు తావివ్వవద్దని మంత్రి కొల్లు రవీంద్ర స్పష్టం చేశారు. పదవుల విషయంలో పార్టీ అధిష్ఠానం తీసుకునే నిర్ణయమే శిరోధార్యమని, అధిష్ఠానం సూచించిన వారితో కలిసి అందరూ పనిచేయాలని సూచించారు. వ్యక్తిగత విభేదాలను పక్కనపెట్టి కూటమి బలోపేతానికి సమష్టిగా కృషి చేయాలని పిలుపునిచ్చారు. బందరు పోర్టు, గోవా షిప్యార్డ్, తదితర ప్రతిపాదిత పారిశ్రామిక ప్రాజెక్టులతో మచిలీపట్నం రూపురేఖలు మారనున్నాయని మంత్రి తెలిపారు. పోర్టు అభివృద్ధితో పాటు పరిశ్రమలు, పెట్టుబడులు, ఉపాధి అవకాశాలు పెరిగే అవకాశం ఉందన్నారు. మచిలీపట్నం అభివృద్ధిని మరింత వేగవంతం చేసేందుకు ప్రభుత్వం కృషి చేస్తోందని చెప్పారు. ఇప్పటికే మచిలీపట్నంలో రోడ్లు, పార్కులు, శ్మశాన వాటికలు తదితర మౌలిక వసతుల అభివృద్ధికి చర్యలు చేపట్టామని తెలిపారు. రానున్న రోజుల్లో మరిన్ని అభివృద్ధి కార్యక్రమాలను చేపట్టనున్నట్లు వెల్లడించారు.
ప్రతి ఇంటికీ ప్రభుత్వం చేసిన పనులు
ఈ నెల 30 నుంచి చేపట్టనున్న ‘ఇంటింటికీ కూటమి ప్రభుత్వం’ కార్యక్రమంలో భాగంగా ప్రతి ఇంటినీ సందర్శించి ప్రభుత్వం చేపట్టిన అభివృద్ధి, సంక్షేమ కార్యక్రమాలను ప్రజలకు వివరించాలని నాయకులు, కార్యకర్తలకు సూచించారు.
రానున్న స్థానిక సంస్థల ఎన్నికలను దృష్టిలో ఉంచుకుని క్షేత్రస్థాయిలో సమన్వయంతో పనిచేయాలని సమావేశంలో నిర్ణయించారు. కార్యక్రమంలో జిల్లా తెలుగుదేశం పార్టీ అధ్యక్షుడు వీరంకి గురుమూర్తి, ఏపీఎస్ఆర్టీసీ చైర్మన్ కొనకళ్ల నారాయణరావు, జనసేన పార్టీ నియోజకవర్గ ఇన్చార్జి బండి రామకృష్ణ, బీజేపీ నాయకుడు పంతం గజేంద్రతో పాటు పలువురు కూటమి నాయకులు పాల్గొన్నారు.
