- తప్పుచేస్తే తాటతీస్తారన్న భయముండాలి
- అలాగే.. పోలీసు అలసత్వాన్నీ సహించేది లేదు
- శాంతి భద్రతల విషయంలో ‘నో కాంప్రమైజ్‌’
- అఘాయిత్యాలకు పాల్పడితే.. అదే వాళ్ల చివరి రోజు
- ఏపీ పోలీస్‌ ప్రతిష్టను మళ్లీ సాధించుకుందాం..
- విచారణలో ఆలస్యమైతే.. నేనే ఘటనా స్థలికెళ్తా
- డ్రంక్‌ అండ్‌ డ్రైవ్‌పై కఠినంగా వ్యవహరించండి
- గంజాయి, డ్రగ్స్‌పై ఉక్కుపాదం మోపాలి..
- ప్రజల భద్రతకు పోలీస్‌ భరోసానివ్వాలి..
- హోంశాఖ సమీక్షలో సీఎం చంద్రబాబు ఆదేశం
అమరావతి (చైతన్య రథం): రాష్ట్ర పోలీసింగ్‌లో స్పష్టమైన మార్పు కనిపించాలని ముఖ్యమంత్రి నారా చంద్రబాబు నాయుడు అన్నారు. నేరాలకు పాల్పడితే శిక్ష తప్పదన్న భయం కలిగేలే పోలీసు శాఖ పనిచేయాలన్నారు. నేరస్తులను పట్టుకోవడం, శిక్షించడంతోపాటు… అసలు నేరం చేయాలంటేనే భయపడే పరిస్థితి కల్పించాలన్నారు. ప్రజా భద్రతకు భరోసా ఇచ్చేలా పోలీసు పనితీరు ఉండాలంటూ.. పూర్తిస్థాయి శాంతిభద్రతలతో మళ్లీ ప్రశాంతమైన రాష్ట్రంగా ఏపీ కనిపించాలని సీఎం ఆదేశించారు. రాజకీయ ముసుగులో ఎవరైనా అరాచకాలకు పాల్పడితే కఠినంగా వ్యవహరించాలన్నారు. శాంతి భద్రతలు కాపాడే విషయంలో, నేరాల విచారణ, నేరస్తులకు శిక్షల విషయంలో అధికారులు ఫలితాలు కనిపించేలా పనిచేయాలని సూచించారు. హోంశాఖను ముఖ్యమంత్రి చంద్రబాబు బుధవారం సమీక్షించారు. హోంమంత్రి వంగలపూడి అనిత, డీజీపీ ద్వారాకా తిరుమలరావుతో పాటు పోలీసు శాఖలోని ఉన్నతాధికారులు సమీక్షకు హాజరయ్యారు.
గత ప్రభుత్వంలో 46 శాతం పెరిగిన నేరాలు
సచివాలయంలో జరిగిన సమీక్షలో గత పదేళ్లలో పోలీసు శాఖ పరిస్థితిని అధికారులు వివరించారు. 2014-19తో పోల్చితే 2019-24లో క్రైంరేట్‌ 46 శాతం పెరిగిందని వివరించారు. 2014-19తో పోల్చుకుంటే 2019-23 మధ్యకాలంలో మహిళలపై నేరాలు 35.91 శాతం, మహిళల అదృశ్యం కేసులు 84.83 శాతం, సైబర్‌ నేరాలు 134.43 శాతం పెరిగాయన్నారు. అలాగే గంజాయి, డ్రగ్స్‌ కేసులు 107.89 శాతం, చిన్న పిల్లలపై నేరాలు 151.88 శాతం పెరిగాయని వెల్లడిరచారు. గత ప్రభుత్వ తీరుతో పోలీసు శాఖ ఎలా నిర్వీర్యమైందో పవర్‌ పాయింట్‌ ప్రజెంటేషన్‌ ద్వారా వివరించారు. పోలీసు శాఖలో ఆయా విభాగాలకు ఇవ్వాల్సిన చిన్న చిన్న ఆర్థిక మొత్తాలను కూడా చెల్లించకపోవడం వల్ల పోలీసులు, పోలీసు శాఖ ఎదుర్కొన్న ఇబ్బందుల గురించి ప్రభుత్వం దృష్టికి తీసుకొచ్చారు.
పరికరాల ఏఎంసీకి దిక్కులేదు….కాలం చెల్లిన వాహనాలు
పోలీసు శాఖ వద్ద 143 డ్రోన్లు ఉంటే అందులో 88 పనిచేస్తున్నాయని తెలిపారు. బాడీ వోర్న్‌ కెమేరాలు 1250 ఉంటే 444 మాత్రమే పనిచేస్తున్నాయని వివరించారు. లాక్డ్‌ హౌస్‌ మానిటరింగ్‌ సిస్టంలో 1180 కెమేరాలకుగాను కేవలం 317 మాత్రమే పనిచేస్తున్నాయని, రాష్ట్రంలో వివిధ ప్రాంతాల్లో ఉన్న 14,712 సీసీ కెమేరాల్లో 2371 కెమేరాలు పనిచేయడం లేదని వివరించారు. ఆటోమేటెడ్‌ ఫింగర్‌ ప్రింట్‌ ఐడెంటిఫికేషన్‌ సిస్టం కూడా పనిచేయడం లేదని తెలిపారు.
వీటన్నింటినీ తిరిగి వాడుకలోకి తెచ్చేందుకు అవసరమైన రూ.30 కోట్లు నిధులు కూడా గత ప్రభుత్వం ఇవ్వలేదని అధికారులు ముఖ్యమంత్రికి వివరించారు. యాన్యువల్‌ మెయింటనెన్స్‌ ఛార్జీలు చెల్లించకపోవడం వల్ల చాలా సేవలు అందుబాటులో లేకాండా పోయాయని…. వీటివల్ల నేర విచారణలో తీవ్ర ఇబ్బందులు తలెత్తుతున్నాయని తెలిపారు. పోలీసు విభాగంలో 2014-19 మధ్య 5215 వాహనాల కొనుగోలుకు రూ.221.8 కోట్లు ఖర్చు చేస్తే.. వైసీపీ ప్రభుత్వం కేవలం రూ.67.3 కోట్లు మాత్రమే ఖర్చు చేసిందన్నారు. కాలం చెల్లిన వాహనాలతో పోలీసు శాఖ ఇబ్బంది పడుతోందని… ప్రస్తుతం 2812 వాహనాల కోసం రూ.281 కోట్లు బడ్జెట్‌ అవసరమని అధికారులు ముఖ్యమంత్రికి వివరించారు.
నిధుల విడుదలకు సీఎం అంగీకారం
ముఖ్యమంత్రి మాట్లాడుతూ పోలీసు శాఖను మళ్లీ గాడిలో పెట్టేందుకు అవసరమైన అన్ని చర్యలు తీసుకుంటామని తెలిపారు. ఆయా వ్యవస్ధల్లో పరికరాల నిర్వహణ ఖర్చులకు ఎప్పటి నుంచో పెండిరగులో ఉన్న రూ.10 కోట్లు వెంటనే విడుదల చేస్తున్నట్లు తెలిపారు. అదేవిధంగా సీసీ కెమేరాల ఏర్పాటులో పెండిరగులో ఉన్న రూ.11 కోట్ల బిల్లులు కూడా మంజూరు చేస్తున్నట్లు ప్రకటించారు. పోలీస్‌ శాఖను ఆధునికీకరించే కార్యక్రమంలో భాగంగా రాష్ట్రవాటాగా రూ.61 కోట్లు విడుదల చేయడానికి సీఎం ఆమోదం తెలిపారు.
గత ప్రభుత్వం పోలీసులను క్షక్ష సాధింపులకు, ప్రజల, రాజకీయ పార్టీల అణిచివేతకు ఉపయోగించుకుంది కానీ…..పోలీసు శాఖ సామర్థ్యం మాత్రం పెంచేలేదన్నారు. నేర పరిశోధనలో కీలకమైన ఫింగర్‌ ప్రింట్‌వంటి విభాగాలకు, పరికరాలకు కనీసం రూ.10 కోట్లు యాన్యువల్‌ మెయింటనెన్స్‌ చార్జెస్‌ చెల్లించకపోవడంపై ముఖ్యమంత్రి విస్మయం వ్యక్తం చేశారు. పోలీసు శాఖను మళ్లీ గాడిన పెడతామని….. రాష్ట్రస్థాయి అధికారుల నుంచి కింద పనిచేసే ఎస్‌ఐ వరకు మార్పు కనిపించాలని సీఎం స్పష్టం చేశారు. మహిళలపై హింస విషయంలో చాలా కఠినంగా ఉండాలి. ఆడబిడ్డల జొలికి వస్తే అదే చివరి రోజు అనేది నేరస్తులకు అర్థం కావాలని ముఖ్యమంత్రి అధికారులకు సూచించారు. గత ప్రభుత్వ విధానాల వల్ల రాష్ట్రంలో గంజాయి సాగు, సరఫరా, వాడకం విపరీతంగా పెరిగిందని.. డ్రోన్స్‌ను వినియోగించి గంజాయి పంట ఎక్కడ ఉందో గుర్తించి నాశనం చేయాలన్నారు.
రాష్ట్రంలో, గంజాయి డ్రగ్స్‌ అనే మాట వినిపించకూడదన్నారు. గంజాయి రహిత రాష్ట్రం కోసం ఉత్పత్తి, సరఫరా, వాడకం మధ్య ఉన్న చైన్‌ తెంచడం ద్వారా పటిష్ట చర్యలు తీసుకోవాలన్నారు. వచ్చే నెలలో రాష్ట్రంలోని 26 జిల్లాల్లో గంజాయి, డ్రగ్స్‌కు వ్యతిరేకంగా ర్యాలీలు చేద్దామని… ఈ కార్యక్రమంలో తాను కూడా పాల్గొంటానని సీఎం అన్నారు. గంజాయి విషయంలో ప్రజలను చైతన్యపరచాల్సిన అవసరముందని సీఎం అన్నారు. నేరాల విచారణ విషయంలో అసలత్వాన్ని, ఆలస్యాన్ని సహించేది లేదని.. నేరం జరిగిన వెంటనే క్లూస్‌టీం, ఫోరెన్సిక్‌ బృందాలు ఎందుకు వెళ్లడం లేదని సీఎం ప్రశ్నించారు. ఇకపై పరిస్థితి మారాలన్నారు. నేరం జరిగిన చోట వేగంగా పోలీసులు స్పందిచకపోతే… తానే స్వయంగా కొన్ని ఘటనలకు వెళ్లి విచారణను పర్యవేక్షిస్తానని సీఎం స్పష్టం చేశారు.
సైబర్‌ క్రైంపై అవసరమైతే కొత్తచట్టం
సైబర్‌ క్రైంను ఎదుర్కోవడానికి నిపుణులతో చర్చించాలని… అవసరమైతే కొత్త చట్టాలు తీసుకొద్దామని ముఖ్యమంత్రి స్పష్టం చేశారు. ప్రతి జిల్లాలో ఒక సైబర్‌ పోలీస్‌ స్టేషన్‌ పెట్టాలన్నారు. ఇన్వెస్టిగేషన్‌ చార్జెస్‌ కింద కొంత మెత్తం విచారణ అధకారులకు ఇచ్చే విధానాన్ని ఉమ్మడి రాష్ట్రంలో చంద్రబాబు ముఖ్యమంత్రిగా ఉన్న సమయంలో ప్రారభించారని…. ఇప్పుడు దాన్ని మళ్లీ పునరుద్దరించాలని అధికారులు కోరగా దానికి సీఎం అంగీకరించారు. వీటితోపాటు గ్రేహౌండ్స్‌ సెంటర్‌, ఏపి పోలీసు అకాడమీ, ఏపి స్టేట్‌ డిజాస్టర్‌ రెస్పాన్స్‌ పోర్స్‌ సెంటర్‌, ఎపి ఫోరెన్సిక్‌ సైన్స్‌ ల్యాబ్‌ ఏర్పాటు స్థితిగతులను అధికారులు వివరించారు.
కేంద్ర నుంచి వీటికి రావాల్సిన నిధులు తెచ్చుకుని వెంటనే పనులు మొదలు పెట్టాలని సీఎం అదేశించారు. రోడ్డు ప్రమాదాల నివారణలో విషయంలో ఏం చర్యలు తీసుకుంటున్నారు అనే ప్రణాళికతో రావాలని సీఎం ఆదేశించారు. వాహనాల ఫిట్‌నెస్‌ విషయంలో తనిఖీలు నిర్వహించాలని సూచించారు. ఈ విషయంలో వాహనదారులను వేధించినట్లు కాకుండా.. ప్రజల రక్షణకు అవసరమైన అన్ని చర్యలు తీసుకోవాలని సీఎం అన్నారు. ముఖ్యంగా మద్యం సేవించి వాహనాలు నడిపి ప్రమాదాలకు కారణం అయ్యేవారిని వదిలిపెట్టవద్దని చెప్పారు. డ్రంక్‌ అండ్‌ డ్రైవ్‌ విషయంలో కఠినంగా ఉండాలని సీఎం అధికారులకు దిశానిర్ధేశం చేశారు.
విపత్తు నిర్వహణ శాఖనూ నిర్లక్ష్యం చేసిన గత ప్రభుత్వం
విపత్తు నిర్వహణ సంస్థకు తన వాటాగా రాష్ట్ర ప్రభుత్వం ఇవ్వాల్సిన 25 శాతం నిధులు ఇవ్వక పోగా.. కేంద్రంనుంచి వచ్చిన నిధులనూ డైవర్ట్‌ చేశారని అధికారులు వివరించారు. దీనిపై సీఎం ఆశ్చర్యం వ్యక్తం చేశారు. ఇది ఒకరకంగా నేరమన్నారు. భారీ వర్షాల సమయంలో పిడుగులు పడే సందర్భాల్లో ప్రజలను అప్రమత్తం చేసే వ్యవస్థ పనితీరును అధికారులు సీఎంకు వివరించారు. నాటి తెలుగు దేశం హయాంలో ఈ విధానాన్ని అమల్లోకి తెచ్చారు. దీన్ని సమర్థవంతంగా నిర్వహించాలని సీఎం సూచించారు. రాష్ట్రంలో విపత్తులు వచ్చిన సమయంలో వెంటనే సంబంధిత శాఖలు సమన్వయంతో కేంద్రానికి నివేదికలు ఇవ్వాలని…తద్వారా కేంద్రం నుంచి నిధులు తెచ్చుకుని ప్రజలకు సాయం చెయ్యవచ్చని సీఎం అన్నారు.
