- చేనేతల వస్త్రాలను ప్రమోట్ చేస్తా..
- చంద్రబాబు సీఎం అయితేనే చేనేతలకు సంక్షేమం
- రానున్న ఎన్నికల కురుక్షేత్రంలో చేనేత మహిళలు విజ్ఞతతో ఆలోచించాలి
- చేనేత మహిళలతో ముఖాముఖిలో భువనేశ్వరి
ధర్మవరం: ధర్మవరం చేనేత వస్త్రాలను ప్రమోట్ చేసి చేయూతనందిస్తానని టీడీపీ అధినేత చంద్రబాబు సతీమణి నారా భువనేశ్వరి హామీ ఇచ్చారు. వరల్డ్ బుక్ ఆఫ్ రికార్డ్స్ స్థాయికి ధర్మవరం పట్టు వస్త్రాలు వెళ్లడం ఏపీకి గర్వకారణమని భువనేశ్వరి అన్నారు. అదేవిధంగా శిల్పకళావైభవ పట్టుచీర ఇండియా బుక్ ఆఫ్ రికార్డ్స్కి ఎక్కడం ధర్మవరం చేనేతల గొప్పతనానికి నిదర్శనమని అభినందించారు.
ధర్మవరం నియోజకవర్గంలో నిజం గెలవాలి పర్యటన సందర్భంగా రాఘవేంద్రస్వామి కళ్యాణమండపంలో నియోజకవర్గ ఇన్చార్జి పరిటాల శ్రీరామ్ ఆధ్వర్యంలో చేనేత మహిళలతో బుధవారం ఏర్పాటు చేసిన ముఖాముఖి కార్యక్రమంలో భువనేశ్వరి పాల్గొన్నారు. చేనేతలు ఎదుర్కొంటున్న కష్టాలను అడిగి తెలుసుకున్నారు. కార్యక్రమం ప్రారంభంలో చేనేత మహిళలు చేనేత పరిశ్రమలో వాడే పరికరాలు, ముడి పదార్థాలను భువనేశ్వరికి చూపించారు. వాటిద్వారా వస్త్రాలను ఎలా తయారు చేస్తారో భువనేశ్వరికి వివరించారు.
ఈ సందర్భంగా భువనేశ్వరి మాట్లాడుతూ….ధర్మవరం చేనేత చీరలకు 125 సంవత్సరాల చరిత్ర ఉంది. ధర్మవరంలో తయారుచేసే రక్షాబంధన్ చీర గురించి నాకు తెలుసు. సంపంగి చీర, పుష్పవల్లి, రంగవల్లి పట్టు చీరల గురించి నాకు తెలుసు. ధర్మవరం గొప్పదనం గురించి తెలియజేయడానికి పద్మవర్షిణి పట్టుచీర ఒక్కటి చాలు. చేనేత పరిశ్రమ అభివృద్ధికి మొదటినుండి కృషి చేస్తున్న పార్టీ టీడీపీ. సగం ధరకే చేనేత వస్త్రాల పథకం తెచ్చి చేనేత రంగానికి ఊతమిచ్చిన ఘనత నా తండ్రి నందమూరి తారకరామారావుకే దక్కుతుంది. చంద్రబాబు పాలనలో చేనేతలకు గుర్తింపుకార్డులు ఇచ్చి రూ.50వేలు వరకు సబ్సిడీలు అందించి ఆదుకున్నారు. నూలుమీద సబ్సిడీని 10శాతం నుండి 40శాతానికి పెంచిన వ్యక్తి చంద్రబాబు.
చేనేతలకు పనులు లేని సమయంలో భృతి ఇచ్చి ఆదుకున్న వ్యక్తి చంద్రబాబు. 50ఏళ్లు నిండిన చేనేతలకు ప్రతినెల పెన్షన్ ఇచ్చిన వ్యక్తి చంద్రబాబు. వచ్చే ఎన్నికల్లో చంద్రబాబు ముఖ్యమంత్రి అయితే చేనేతలకు మరిన్ని సంక్షేమ పథకాలు అందిస్తారు. గతంలో చేనేతలకు చంద్రబాబు అందించిన పథకాలను పునరుద్ధరిస్తారు. చేనేతలకు ఇప్పటికే చంద్రబాబు కొన్ని హామీలు ఇచ్చారు. మగ్గం ఉన్న చేనేతలకు 200యూనిట్లు వరకు ఉచిత విద్యుత్ అందిస్తారు. మరమగ్గాలు ఉన్నవారికి 500యూనిట్ల విద్యుత్ ఉచితంగా ఇవ్వనున్నారు.
ముడిసరుకు కొనుగోలుకు రాయితీలతో పాటు రుణాలు మంజూరు చేస్తామని మీకు చంద్రబాబు హామీ ఇచ్చారు. చేనేత వస్త్రాలపై జీఎస్టీ రద్దు అయ్యేలా చూస్తామని, కేంద్రం ఒప్పుకోకపోతే ఆ భారాన్ని రాష్ట్ర ప్రభుత్వమే భరించేలా చర్యలు తీసుకుంటామని చంద్రబాబు హామీ ఇచ్చారు. చేనేతలు అత్యధికంగా ఉన్న ప్రాంతాల్లో కామన్ వర్కింగ్ షెడ్లను నిర్మిస్తారు. ఆత్మహత్య చేసుకున్న చేనేతల కుటుంబాలకు రూ.10 లక్షలు పరిహారం అందిస్తారు. చేనేత పరిశ్రమలో మహిళల భాగస్వామ్యం చాలా అవసరం. వాళ్ల సహకారం లేకపోతే చేనేత పరిశ్రమ రాణించడం కష్టం. చేనేతలంతా ధైర్యంగా ఉండండి..మీకు మంచిరోజులు రాబోతున్నాయి. ఆడపిల్లలు చదువుకోవాలి, మహిళలు తమ కాళ్లపై తాము నిలబడాలి అని నా తండ్రి, నా భర్త కోరుకున్నారు. ఎన్టీఆర్ ఆశయ సాధన కోసం స్థాపించిన ఎన్టీఆర్ మెమోరియల్ ట్రస్ట్ ఈ రెండిరటినీ సాధించడానికి ఎప్పుడూ కట్టుబడి ఉంది.
పేదరికం అనేది ఆడపిల్లల చదువుకు ఆటంకం కాకూడదనే ఉద్దేశంతోనే ఎన్టీఆర్ ట్రస్ట్ ద్వారా స్త్రీ విద్యకు ప్రాధాన్యతనిస్తున్నాం. మహిళలు ఆర్థికంగా బలోపేతం కావడం కోసం వినుకొండలో 1200 మందికి కుట్టుమిషన్లు పంపిణీ చేసి శిక్షణ ఇప్పించాం. పట్టిసీమ ద్వారా గోదావరి జలాలను రాయలసీమకు తీసుకురావడం వల్ల ఇక్కడి భూముల విలువ పెరిగింది. అంతేకాకుండా అనంతపురం జిల్లాకు చంద్రబాబు కియా పరిశ్రమ తెచ్చి వేలాది ఉద్యోగాలు వచ్చేలా చేశారు. అంతేకాకుండా అనంతపురం జిల్లాలో టెక్స్టైల్ పార్క్, ఫుడ్ పార్క్, పార్క్ మోబిస్ ఇండియా, హార్డ్వేర్ క్లస్టర్లు, స్మార్ట్ సిటీ వంటి పరిశ్రమలు తెచ్చి ఉపాధి అవకాశాలు కల్పించారు. ఉద్యాన పంటల హబ్ గా అనంతపురం జిల్లాను చంద్రబాబు తీర్చి దిద్దారు.
లోకేష్ ఇక్కడ పాదయాత్ర చేసే సమయంలో మిషన్ రాయలసీమ డిక్లరేషన్ ఇచ్చారు. అనంతపురం జిల్లాను ఆటోమొబైల్ హబ్ గా చేస్తానని హామీ ఇచ్చారు. ఇవన్నీ జరగాలంటే రానున్న ఎన్నికల కురుక్షేత్రంలో మహిళలు ఓటు అనే ఆయుధాన్ని దుర్మార్గపు ప్రభుత్వాన్ని గద్దె దించడానికి వాడాలి. భవిష్యత్తులో చేనేత పరిశ్రమ మరింత అభివృద్ధి చెందాలని కోరుకుంటున్నాను..అని భువనేశ్వరి అన్నారు.
