అమరావతి: రానున్న రాజకీయ సునామీలో జగన్‌రెడ్డి వైసీపీ ఆనవాళ్లు లేకుండా కొట్టుకుపోతుందని టీడీపీ పొలిట్‌బ్యూరో సభ్యుడు, శాసనమండలి ప్రతిపక్ష నేత యనమల రామకృష్ణుడు జోస్యం చెప్పారు. అబద్దాలు, అసత్య ప్రచారాలు, కుట్రలు, కుతంత్రాలు, మోసకారి హామీలపై కట్టిన వైసీపీ పునాదులు ఒక్కొక్కటిగా కూలిపోతున్నాయని శుక్రవారం ఒక ప్రకటనలో యనమల అన్నారు. నా ఎస్సీ, నా ఎస్టీ, నా బీసీ, నా మైనారిటీ అని చెప్పి పేద, బడుగు, బలహీన వర్గాలను వంచించిన జగన్మోహన్‌ రెడ్డికి నేడు ఆయా సామాజికవర్గాల నుండి ఎదురుగాలి మొదలైంది. జగన్‌ రెడ్డిని తమ భవిష్యత్తుగా భావించిన ఎస్సీ, ఎస్టీ, బీసీ, మైనారిటీ నాయకులే నేడు జగన్మోహన్‌ రెడ్డి తమను నమ్మించి మోసం చేశాడని, స్వార్థానికి వాడుకుని వదిలేశాడని బహిరంగ సభల్లోనే చెప్పే పరిస్థితులు మనం చూస్తున్నాం. కొంతమంది ఎమ్మెల్యేలు ప్రాధాన్యత లేని చోట, గౌరవం లేని చోట మేం నిలవలేము… మీకు మీ పార్టీకో నమస్కారం… మేం పోటీ చేయలేం… మమ్మల్ని వదిలేయండని జగన్‌ రెడ్డి ముఖం మీద చెప్పే పరిస్థితులు వచ్చాయి. జగన్మోహన్‌ రెడ్డి నిజ స్వరూపాన్ని ఆ పార్టీలోని కీలక నాయకులే నేడు బట్టబయలు చేస్తున్నారు. వై నాట్‌ 175 అంటున్న జగన్మోహన్‌ రెడ్డి నేడు పులివెందులలో కూడా గెలిచే పరిస్థితులు లేవని ఐప్యాక్‌ హెచ్చరించడం జగన్మోహన్‌ రెడ్డి పతనానికి కౌంట్‌ డౌన్‌ స్టార్ట్‌ అయినట్లేనని యనమల అభిప్రాయపడ్డారు.
జగన్‌ వదలిన బాణం ఆయన వైపే శరవేగంగా దూసుకొస్తోంది
2019 ఎన్నికల్లో జగన్‌ రెడ్డి వదలిన బాణం తిరిగి జగన్‌ రెడ్డివైపే శరవేగంగా దూసుకొస్తోంది. ఆ బాణమే జగన్‌ రెడ్డిని కనీసం ఎమ్మెల్యేగా గెలవకుండా వైసీపీ పునాదులను కూలదోయబోతోంది. వైసీపీని నమ్ముకున్న ఎస్సీ, ఎస్టీ, బీసీ నాయకులందరూ.. తమను జగన్మోహన్‌ రెడ్డి ఎన్నికల అస్త్రాలుగా వాడుతున్నాడే తప్ప మనుషులుగా గుర్తించడం లేదని వాపోతున్నారు. జగన్‌ ను సీఎం చేసేందుకు తాము చేసిన పోరాటాలు, త్యాగాలను గుర్తించకుండా.. కేవలం రెడ్డి సామాజికవర్గానికే ప్రాధాన్యతనివ్వడం పట్ల లోలోపల కుమిలిపోతున్నారు. అధికారాన్ని, నిధులను జగన్‌ రెడ్డి వద్దే కేంద్రీకరించుకుని ఏ నియోజకవర్గంలోనూ అభివృద్ధి లేకుండా చేసి.. వాటికి ఎమ్మెల్యేలను బాధ్యులుగా చేసి జగన్‌ రెడ్డి బలిచేస్తున్నాడు. నేడు సీట్లు ఇవ్వకుండా మానసికంగా వేధిస్తున్నాడు.
ఆంధ్రప్రదేశ్ చరిత్రలో ఏనాడూ లేని వింత, వికృత సంస్కృతిని జగన్మోహన్‌ రెడ్డి అవలంబించడం పట్ల వైసీపీ నాయకులు అయోమయంలో పడ్డారు. ఏ ఎస్సీ, ఎస్టీ, బీసీ, మైనారిటీలు జగన్‌ రెడ్డిని సీఎం పీఠం ఎక్కించారో….అవే సామాజికవర్గాలు నేడు వైసీపీ పునాదులను కూలదోసి, జగన్‌ రెడ్డిని తాడేపల్లి ప్యాలెస్‌ కు పరిమితం చేయడానికి సమయం కోసం ఎదురుచూస్తున్నారు. జగన్‌ రెడ్టీ… నీ అవినీతి, అక్రమాలు, దుర్మార్గాలు, నయవంచనకు తగిన బుద్ధిని రాష్ట్ర ప్రజలు 2024లో చెప్పబోతున్నారు.
బైబై జగన్‌… మాకొద్దు జగన్‌… సైకో పోవాలి… సైకిల్‌ రావాలి…. అనే నినాదాలను రాష్ట్ర ప్రజలు అందుకున్నారు.. 2024లో విజయ దుందుభి మోగించేది టీడీపీనే అని యనమల స్పష్టం చేశారు.
