వైసీపీ ప్రభుత్వాన్ని భూస్థాపితం చేసే వరకు వదలబోం

విజయనగరం,చైతన్యరథం: రాష్ట్రంలో అరాచక, విధ్వంసక దోపిడీలకు కారణం అయిన ఈ ప్రభుత్వాన్ని భూస్థాపితం చేసే వరకు వదలబోమని, ఈ ముఖ్యమంత్రి రాష్ట్రానికే భారం అని టీడీపీ అధినేత నారా చంద్రబాబునాయుడు, జనసేన అధ్యక్షులు పవన్‌ కళ్యాణ్‌ పేర్కొన్నారు.  ప్రజలకు మంచి చేయడం జనసేన, టీడీపీ, బీజేపీ నాయకత్వంతోనే సాధ్యమని తెలిపారు. జగన్‌ లాంటి అవినీతి పరుడు, గూండాను బంగాళా ఖాతంలో కలిపేయాలంటే కూటమి అధికారంలోకి రావాలని, 2024 సార్వత్రిక ఎన్నికల్లో వైసీపీ అవినీతి కోటను బద్ధలు కొట్టి… కూటమి ప్రభుత్వాన్ని స్థాపిస్తున్నామని చెప్పారు. బుధవారం రాత్రి  విజయనగరంలో జరిగిన ప్రజాగళం సభలో పవన్‌ కళ్యాణ్‌, చంద్రబాబు మాట్లాడారు.  ‘ఒక్క ఛాన్స్‌ ఒక్క ఛాన్స్‌ అన్న జగన్‌ కి ఇదే ఆఖరి ఛాన్స్‌. రాష్ట్రాన్ని నాశనం చేసిన వైసీపీకి వచ్చే ఎన్నికల్లో ప్రజలు శవయాత్ర చేయబోతున్నారు.

ఓటు అనే వజ్రాయుధాన్ని ఉపయోగించి సిద్ధం అంటూ ఊళ్ల మీద పడిన సైకో జగన్‌ ని ఓడిరచడానికి జనం సిద్ధమైపోయారని  చంద్రబాబు స్పష్టం చేశారు.  ‘‘ఈ ముఖ్యమంత్రి గత రెండు ఎన్నికల్లో శవ రాజకీయంతో ప్రజల ముందుకు వచ్చాడు. ఈసారి గులకరాయి డ్రామా మొదలుపెట్టాడు. ఈ ప్రభుత్వానికి పాడె కట్టించేందుకు ప్రజలు సిద్ధమయ్యారు. జగన్‌ నీ రాజకీయాలు అయిపోయాయి. రాబోయేది కూటమి ప్రభుత్వమే. ప్రమాణస్వీకారానికి ముహుర్తం కూడా సిద్ధం చేస్తున్నాం. గత ఎన్నికల్లో పాదయాత్రగా వచ్చాడు. బుగ్గులు నిమిరాడు, ముద్దులు పెడితే ఐసైపోయి ఓటు వేశారు. ఒక్కరికి ఉద్యోగం ఇచ్చింది లేదు. ఉత్తరాంధ్రకు ఒక్క ఇండస్ట్రీ తెచ్చింది లేదు. నీటిపారుదల ప్రాజెక్టు పూర్తి చేసింది లేదు. మీ అరాచక పాలనకు ప్రజల్లో తిరుగుబాటు వచ్చింది. వైసీపీకి డిపాజిట్లు గల్లంతు కావడం ఖాయం. మాన్సాస్‌ ట్రస్ట్‌ మీదే అవినీతి ఆరోపణలు చేశారు. అశోకగజపతి రాజుని వేధించినందుకు జగన్‌ తీవ్ర పరిణామాలు ఎదుర్కొక తప్పదు. పవన్‌ కళ్యాణ్‌, నా మీద నమ్మకానికి మోదీ భరోసా తోడుంది. ప్రజలు గెలవాలి, రాష్ట్రం నిలబడాలి అన్న లక్ష్యంతోనే మూడు పార్టీలు కలిశాం’’ అని చంద్రబాబు పేర్కొన్నారు.

ఉత్తరాంధ్రను వంచించారు

ఉత్తరాంధ్రను జగన్‌ ఘోరంగా వంచించారు. టీడీపీ హయాంలో సాగు నీటి ప్రాజెక్టులకు రూ. 2 వేల కోట్లు ఖర్చు చేశాం. ఈ ఐదేళ్లలో జగన్‌ చేసిన ఖర్చెంతో చెప్పగలడా? వంశధార, నాగావళి అనుసంధానానికి వెళ్లాం. పోలవరం పూర్తి చేసి, ఉత్తరాంధ్ర సుజల స్రవంతి ద్వారా ఉత్తరాంధ్రను సస్య శ్యామలం చేయాలనుకున్నాం. గత ఐదేళ్లలో నిత్యవసర ధరలు పెరిగాయి. 9 సార్లు విద్యుత్‌ ఛార్జీలు పెరిగాయి. మద్యపాన నిషేధం అని చెప్పి మోసం చేశారు. మద్యం ధర పెంచేశారు. ఆర్టీసీ రేట్లు పెంచేశాడు. పన్నులు విపరీతంగా వేశాడు. రాష్ట్రంలో పేదవాడి బతుకు భారంగా తయారయ్యే పరిస్థితి వచ్చింది. జగన్‌ జలగ్గా మారి మీ జీవితాలు నాశనం చేశాడు. ఎన్నికలకు 18 రోజుల సమయమే ఉంది. ప్రజలంతా జనసేన, టీడీపీ, బీజేపీ జెండాలు పట్టుకుని కూటమి గెలుపుకి పని చేయండి. మీ బంగారు భవిష్యత్తుకి బాటలు వేసి రుణం తీర్చుకుంటాం. బాదుడు లేని ప్రభుత్వాన్ని ఇస్తాం. నిత్యవసర వస్తువుల ధరలు తగ్గిస్తాం. రెండు రోజుల్లో మేనిఫెస్టో ఇవ్వబోతున్నాం. మీ జీవితాల్లో వెలుగులు తెస్తాం. దగా కోరు ప్రభుత్వం పోవాలి. దోపిడి ఆగాలి

బొత్స కుటుంబం దోచేస్తే.. వీరభద్రస్వామి ఊడ్చేశారు

విజయనగరం జిల్లాను బొత్స కుటుంబం దోచేసింది. ఎమ్మెల్యేలు., ఎంపీలు, మంత్రులు ఒకే కుటుంబానికి దక్కించుకుని ఏకచత్రాధిపత్యం చేయాలనుకున్నారు. మేము సాధారణ కుటుంబాల నుంచి సమర్ధ నాయకత్వాన్ని తీసుకువచ్చే ప్రయత్నం చేస్తున్నాం. బోత్స దోచుకోగా మిగిలింది ఊడ్చేయడానికి వీరభద్రస్వామి వచ్చాడు. ఈ ఎమ్మెల్యే బినామీలు సెంటు భూమి దొరికినా వాలిపోతారు. అపార్టమెంట్లు కడితే కమిషన్ల కోసం వాడిపోతారు. లే అవుట్లు వేయాలన్నా వాటాలు ఇవ్వాలి. ఇప్పుడు మీ పాసుపుస్తకాల మీద జగన్‌ ఫోటో చేరంది. కొత్త చట్టంలో మీ దగ్గర మీ భూమి రికార్డులు ఉండవు. అంతా ఆన్‌ లైనే. జగన్‌ రికార్డులు మార్చేస్తే మీ జీవితాలు తారుమారైపోతాయి.

విజయనగరంకి అంతా మంచి చేస్తాం. మాన్సాస్‌ ట్రస్ట్‌ ఆధ్వర్యలో నడిచే మహారాజ కళాశాల ప్రైవేటుపరం కానీయం. మహారాజ ఆసుపత్రి పేరు మా ప్రభుత్వం రాగానే పేరు పునరుద్దరిస్తాం. ప్రతి ఇంటికీ కుళాయి ద్వారా రక్షిత మంచినీరిస్తాం.అధికారంలోకి రాగానే టిడ్కోఇళ్లు అందరికీ ఉచితంగా ఇస్తాం. పేద వారికి రెండు మూడు సెంట్లు భూమిచ్చి ఇళ్లు కట్టిస్తా. మోదీ గారి అండతో పేదరికం లేని మొదటి రాష్ట్రంగా రాష్ట్రాన్ని తయారు చేసే విధంగా ప్రణాళికలు రూపొందిస్తున్నాం’’ అని  చంద్రబాబు  చెప్పారు.

ప్రజలు మార్పు కోరుకొంటున్నారు  : పవన్‌ కళ్యాణ్‌

ఈ సభలో మొదట పవన్‌ కళ్యాణ్‌ మాట్లాడుతూ ‘‘విజయనగరం ప్రజలు చూపించిన ప్రేమ, అభిమానం జీవితాంతం గుండెల్లో పెట్టుకుంటాను. ఉత్తరాంధ్ర యువత ఉద్యోగ, ఉపాధి అవకాశాలు కోసం రోడ్ల మీదకు వచ్చారు. మీ గుండె చప్పుడు వినే… 2022లో వైసీపీ వ్యతిరేక ఓటు చీలకూడదని మాట్లాడాను. అందులో భాగంగానే తెలుగుదేశం- జనసేన- బీజేపీ పార్టీలు కూటమిగా ఏర్పడి ఎన్నికలకు వెళ్తున్నాము. మూడు పార్టీలు కలిసి వస్తే జగన్‌ లాంటి అవినీతిపరుణ్ణి గద్దె దించవచ్చు. దానికి గుండె బలం, మేధస్సు కావాలి. ఈ జనసమూహాన్ని చూస్తే మార్పు స్పష్టంగా కనిపిస్తోంది. ఈ మార్పును ఎన్నికల్లో చూపించి వైసీపీని ఇంటికి పంపిద్దాం’’ అని పేర్కొన్నారు.

రాష్ట్ర భవిష్యత్తు కోసం కలిశాం

జనసేన- తెలుగుదేశం- బీజేపీలు కూటమిగా ఏర్పడి కలిసి ఎన్నికల్లో పోటీ చేస్తున్నాం. ఈ కలయిక మా స్వార్థం కోసం కాదు. రాష్ట్ర ప్రజల భవిష్యత్తు కోసం. నిన్న పిఠాపురంలో నామినేషన్‌ వేశాను. నా అఫిడవిట్‌ లో నాకు ఎంత ఆస్తి ఉందో చూపించాను. దాదాపు రూ. 75 కోట్లు వరకు పన్నులు కట్టాను. నాకు డబ్బులు అవసరం లేదు.  ప్రజలకు మంచి భవిష్యత్తు ఉండాలని సేవా నాయకత్వం ఇవ్వడానికి మీ కోసం నిలబడ్డాము. ఆంధ్రప్రదేశ్‌ రాష్ట్రం ఒడిదుడుకుల్లో ఉంది. అప్పుల్లో కూరుకుపోయింది. విద్య, వైద్య, ఉపాధి అవకాశాల్లో వెనుకబడిపోయింది. ఒక్క గంజాయి స్మగ్లింగ్‌ లోనే నెంబర్‌ వన్‌ గా వెలుగుతోంది. చాలా మంది యువత గంజాయి మత్తులో పడి జీవితాలను, భవిష్యత్తును నాశనం చేసుకుంటున్నారు. కన్నవారికి కన్నీరు మిగులుస్తున్నారు.

ఈ మహమ్మారిని రాష్ట్రం నుంచి తరిమేయాలంటే యువతకు బలమైన ఉద్యోగ, ఉపాధి అవకాశాలు కల్పించాలి. ఉద్యోగ, ఉపాధి  కల్పిస్తే ఎలాంటి మాదకదవ్యాల అవసరం లేదు. డ్రగ్స్‌ రహిత ఆంధ్ర ప్రదేశ్‌ అత్యవసరం. యువతకు సరైన ప్రోత్సాహం ఇస్తే వారికి విజయమే వ్యసనంగా మారుతుంది. అలా జరగాలంటే కేంద్రంలో మోదీగారి లాంటి బలమైన నాయకత్వం… రాష్ట్రంలో కూటమి ప్రభుత్వం అధికారంలోకి రావాలి. రాష్ట్రానికి సుస్థిర పాలన అందాలంటే కూటమి ప్రభుత్వమే రావాలి. కూటమి తరఫున విజయనగరం లోక్‌ సభ అభ్యర్థిగా కలిశెట్టి అప్పలనాయుడు, విజయనగరం శాసనసభ నియోజకవర్గం నుంచి శ్రీమతి అదితి గజపతిరాజు పోటీ చేస్తున్నారు. వీరిని భారీ మెజార్టీతో గెలిపించాలి అని  పవన్‌ కళ్యాణ్‌ కోరారు