చంద్రన్న పాలలోనే కార్మికుల సంక్షేమం సాధ్యం

అమరావతి: చంద్రబాబు పాలలోనే  కార్మికుల హక్కుల పరిరక్షణ, వారి సంక్షేమం సాధ్యమవుతుందని రాష్ట్ర కార్మిక, ఫ్యాక్టరీలు, బాయిలర్స్‌, ఇన్సూరెన్సు మెడికల్‌ సర్వీసెస్‌ శాఖ మంత్రి వాసంశెట్టి సుభాష్‌ పేర్కొన్నారు. గురువారం ఉదయం 7.50 గంటల సమయంలో వెలగపూడిలోని రాష్ట్ర సచివాలయం ఐదో బ్లాక్‌ లో మంత్రిగా ఆయన బాధ్యతలు చేపట్టారు. రాష్ట్ర మంత్రిగా బాధ్యతలు చేపట్టిన వెంటనే గత ప్రభుత్వ హయాంలో అమల్లోవున్న వైఎస్సార్‌ బీమా పథకం పేరును చంద్రన్న బీమా పథకంగా మార్చే ఫైల్‌పై  తొలి సంతకం చేశారు. ఈ సందర్బంగా ఆయన మాట్లాడుతూ గత ప్రభుత్వం అనుసరించిన ఇసుక పాలసీ వల్ల నిర్మాణ రంగం కుదేలయిందన్నారు. ఫలితంగా భవన నిర్మాణ కార్మికులకు పనుల్లేక ఎన్నో సమస్యలను ఎదుర్కున్నారన్నారు. కార్మికుల సంక్షేమం విషయంలో గత ప్రభుత్వం పూర్తిగా నిర్లక్ష్యం వహించిందన్నారు. నవరత్నాల అమలు పేరుతో కార్మికుల సంక్షేమానికి  సంబంధించిన 13 రకాల పథకాల అమలును గత ప్రభుత్వం నిలుపు చేసిందన్నారు.

కార్మిక శాఖకు సెస్సు రూపేణా వచ్చిన రూ.3,000 కోట్లను పూర్తిగా పక్కదారి పట్టించిందన్నారు. కార్మిక బీమా పథకం కింద గతంలో చంద్రబాబు హయాంలో రూ.2.55 కోట్ల బీమా సొమ్మును చెల్లిస్తే, గత వైసీపీ ప్రభుత్వ హయాంలో కేవలం రూ.1.25 కోట్లను మాత్రమే చెల్లించారని మంత్రి విమర్శించారు.  రాష్ట్రంలో విశాఖపట్నం, రాజమండ్రి, తిరుపతి, విజయవాడల్లోని ఈఎస్‌ఐ ఆసుపత్రులను గత  ప్రభుత్వం పూర్తిగా నిర్లక్ష్యం చేసిందన్నారు. 238 పోస్టులను భర్తీ చేసే అవకాశం ఉన్నా చేయకుండా ఈఎస్‌ఐ ఆసుపత్రులను గాలికి వదిలేసిందని విమర్శించారు. బాల కార్మిక వ్యవస్థ నిర్మూలన విషయంలో కూడా గత ప్రభుత్వం పూర్తిగా అశ్రద్ధ వహించిందన్నారు. బాల కార్మిక వ్యవస్థను పూర్తిగా నిర్మూలించేందుకు తమ ప్రభుత్వం గట్టిగా కృషి చేస్తుందన్నారు.  ముఖ్యమంత్రి చంద్రబాబు నాయుడు తనపై నమ్మకంతో కార్మిక శాఖ మంత్రిగా బాధ్యతలు అప్పగించారని, ఆయన నమ్మకం ఏ మాత్రం వమ్ము చేయకుండా  కార్మికుల సంక్షేమానికి, బాల కార్మిక వ్యవస్థ నిర్మూలను శాయశక్తులా కృషిచేస్తానని మంత్రి స్పష్టం చేశారు.

గురువారం ఉదయం 7.50 గంటల సమయంలో వెలగపూడిలోని రాష్ట్ర సచివాలయంలో మంత్రిగా వాసంశెట్టి సుభాష్‌ బాధ్యతలు చేపట్టారు. అమరావతి సచివాలయం ఐదో బ్లాక్‌లో ఆయనకు కేటాయించిన ఛాంబరులో వేద పండితుల మంత్రోచ్ఛారణల మధ్య ఎంతో  ఘనంగా  రాష్ట్ర మంత్రిగా ఆయన బాధ్యతలు చేపట్టారు. మంత్రిగా బాధ్యతలు చేపట్టేందుకు సతీసమేతంగా రాష్ట్ర సచివాలయానికి విచ్చేసిన ఆయనకు వేదపండితులు పూర్ణకుంభంతోను, అధికారులు పుష్పగుచ్ఛాలతోను ఘనంగా స్వాగతం పలికారు. రాష్ట్ర కార్మికశాఖ కార్యదర్శి హరి జవహర్‌లాల్‌, కమిషనర్‌ శేషగిరి బాబు, ఫ్యాక్టరీల డైరెక్టర్‌ చంద్రశేఖర్‌ వర్మ, బాయిలర్స్‌ డైరెక్టర్‌ ఉమామహేశ్వరరావు, ఇన్సూరెన్స్‌ మెడికల్‌ సర్వీసెస్‌ డైరెక్టర్‌ ఆంజనేయులు, తదితరులతో పాటు పలువురు అధికారులు, అనధికారులు మంత్రికి పుష్పగుచ్ఛాలు అందజేసి అభినందనలు తెలిపారు.