- పోలీసులు మరో అమాకుడిని బలిచేయొద్దు
- ఇద్దరికి తగిలిన రాయి ఎలా మాయమయింది
- జగన్ నటనకు ఆస్కార్‌ అవార్డు ఇవ్వాలి
- టీడీపీ పొలిట్‌బ్యూరో సభ్యుడు వర్ల రామయ్య వ్యంగ్యాస్త్రాలు
అమరావతి (చైతన్యరథం): జగన్ గులకరాయి కథ అడ్డం తిరిగిందని టీడీపీ పొలిట్‌బ్యూరో సభ్యుడు వర్ల రామయ్య ఎద్దేవా చేశారు. మంగళగిరిలోని తెలుగుదేశం పార్టీ జాతీయ కార్యాలయంలో మంగళవారం ఏర్పాటు చేసిన విలేఖరుల సమావేశంలో ఆయన మాట్లాడుతూ వైసీపీ సృష్టించిన డ్రామా వారికే ఎదురుతిరిగిందన్నారు. జగన్ ఆడే డ్రామా పూర్తవకముందే ఎదురుతిరిగి, అందులోని నటులు అభాసుపాలయ్యారు. ఒకే రాయి ఇద్దరికి తగిలి, కింద పడకుండా మాయమవడం ఆశ్చర్యంగా ఉంది. గులకరాయి కథ ఎవరు రచించారోగానీ కథలో పట్టులేదు, అందుకే రక్తి కట్టలేదు. గతంలో చిన్న కోడికత్తితో గుచ్చితే ఐదు సంవత్సరాలపాటు ఒక అమాయకుడిని జైల్లో పెట్టించిన ఘనత జగన్మోహన్‌ రెడ్డిది. ఇప్పుడు గులకరాయి డ్రామాలో కూడా విజయవాడ పోలీసు కమిషనర్‌ కాంతిరాణా ఒక అర్భకుడిని, అమాయకుడిని బలిచేయబోతున్నారు. జగన్ అధికార దాహానికి మరో అమాయకుడు జైలు పాలు కాబోతున్నాడు. ఒక అమాయకుడిని బలిచేసి చెడ్డపేరు తెచ్చుకోవద్దని సీపీ రాణాకు వర్ల హితవు చెప్పారు.
డ్రామా ప్రజలకు అర్థమయింది
చిమ్మ చీకటిలో జగన్ వైపు దూసుకు వచ్చిన రాయిని కెమెరాలో ఎలా బంధించగలరు? స్కాట్లాండ్‌ యార్డు పోలీసులు కూడా పట్టుకోలేని ఈ అగంతకుడిని మన పోలీసులు ఎలా పట్టుకున్నారు? వైసీపీ ట్రేడ్‌ మార్క్‌ గొడ్డలి అయితే గులకరాయి ఎందుకు వాడారు? అందుకే కథ అడ్డం తిరిగింది. జగన్, సజ్జలను సంతృప్తి పరచడానికి రాణా తాపత్రయపడటం మంచిదికాదు. గజమాలకు ఉన్న పుల్ల గుచ్చుకోగానే వెంటనే జగన్ చేయి పుల్ల గుచ్చుకున్న చోటికే వెళ్లటం వీడియోల్లో స్పష్టంగా కనిపిస్తోంది. అక్కడి నుంచి నాటకం ప్రారంభమైంది. జగన్ టవల్‌ తో గాయాన్ని అద్దుకున్నారు. ఇదీ డ్రామాలో ఒక భాగమే. విజయవాడ ప్రభుత్వ ఆసుపత్రిలో జగన్ కు అందించిన నాణ్యమైన వైద్యం కూడా డ్రామాలో భాగమే. గులకరాయి డ్రామా రచించిన రచయితకు నంది అవార్డు ఇవ్వాలి. జగన్ ఆడిరది ముమ్మాటికి డ్రామానే అని ప్రజలు అర్థం చేసుకున్నారు. ఈ గులకరాయి డ్రామాలో అద్భుతంగా నటించిన జగన్ కు ‘ఆస్కార్‌’ అవార్డు ఇవ్వాలని వర్ల వ్యంగ్యాస్త్రాలు సంధించారు.
మళ్లీమళ్లీ అవే డ్రామాలా..
రాష్ట్ర ప్రజల చెవుల్లో ఒకసారి పూలు పెట్టారు. జగన్ ఒక్క ఛాన్స్‌ అనడంతో ప్రజలంతా జగన్ భ్రమలో, మాయలో పడ్డారు. అసాధ్యపు వాగ్దానాలు నమ్మి ఓటేసి ముఖ్యమంత్రిని చేశారు. పదే పదే అదే డ్రామా ఆడకూడదు. అందుకే కథ అడ్డం తిరిగింది. రాష్ట్రంలో ఎక్కడ నలుగురు వ్యక్తులు చేరినా ముఖ్యమంత్రి డ్రామా బలే ఆడాడురా.. కాని ఫెయిల్‌ అయ్యాడురా అని మాట్లాడుకుంటున్నారు. విజయవాడ సీపీ రాణా ఈ విషయంలో తొందరపడొద్దు. అమాయకుడిని బలిచేసి చెడ్డ పేరు తెచ్చుకోవద్దని వర్ల చెప్పారు.
కరెంటు పోతే ముఖ్యమంత్రి స్థాయి వ్యక్తిని ఎవరైనా వీధుల్లో తిప్పుతారా? సెక్యురిటీ వారికి బుర్ర లేదు. ఫ్లాష్‌ లైట్లన్నీ వెలిగించి ఉండాల్సింది. లైట్లన్నీ ముఖ్యమంత్రిపై పడేలా చేయాల్సింది. కరెంటు లేని సమయంలో వాహనంపై ముఖ్యమంత్రి నిలబడతాను అని చెప్పినా సెక్యూరిటీ అధికారులు అంగీకరించకూడదు. అలాంటి సమయాల్లో నిలబడనీయకూడదు. మెడలు వంచి కింద కూర్చోబెట్టాలి. సెక్యురిటీ అధికారుల డ్యూటీ అది. ముప్పు నుంచి తప్పించడానికే ఇలా చేస్తారని వర్ల వివరించారు.
ఆ రాయి ఎక్కడికి ఎగిరిపోయంది?
మాకొద్దు ఈ జగన్ అని ప్రజలు నిర్ధారణకు వచ్చారు. అఖండ మెజార్టీతో మరలా చంద్రబాబు నాయుడును ముఖ్యమంత్రి స్థానంలో కూర్చో బెట్టడానికి నిర్ణయం తీసుకున్నారు. ఆ విషయం జగన్ కు కూడా అర్థమయింది. అందుకే ఏదో ఒక డ్రామా ఆడి తన అధికారాన్ని నిలబెట్టుకోవాలని తాపత్రయపడుతున్నారు. ఎవరైనా ఎక్కడి నుంచో దూరం నుంచి చిన్న రాయి విసిరి హత్యా ప్రయత్నం చేస్తారా? ఇదంతా కట్టుకథ కాకపోతే మరేంటి? గులకరాయితో కొట్టి చంపాలనే ప్లాన్‌ ఎవరికీ రాదు. ఈ కట్టుకథ అల్లిన విజయవాడ పోలీసులకే ఆ ఘనత దక్కుతుంది. హత్యా ప్రయత్నం లేదు, గులకరాయి లేదు, దండలో పుల్ల తగిలి ఉంటుంది తప్పితే మరొకటి కాదని వర్ల రామయ్య స్పష్టం చేశారు.
