ఐదేళ్లలో పోలీసు వ్యవస్థను నాశనం చేశారు

• పోలీసుల పనితీరులో మార్పు తెస్తాం
• రెడ్‌బుక్‌ అనేది కక్ష సాధింపుల కోసం కాదు
• నిబంధనలు ఉల్లంఘించిన అధికారులపై చట్టప్రకారం చర్యలు
• ప్రజల భాగస్వామ్యంతో గంజాయిని అరికడతాం
• హోం మంత్రి అనిత స్పష్టీకరణ

అమరావతి: వైసీపీ ప్రభుత్వంలో పోలీసు వ్యవస్థను నాశనం చేశారని, పోలీసులను కేవలం బందోబస్తుకే వాడారని, పోలీసు అకాడమీ, గ్రేహౌండ్స్‌ అకాడమీ కూడా లేదని, కేంద్రం నుంచి నిధులు వచ్చినా పోలీసు అకాడమీ నిర్మాణాలు చేయలేదని రాష్ట్ర హోంమంత్రి వంగలపూడి అనిత అన్నారు. గురువారం డీజీపీ, ఇతర ఉన్నతాధికారులతో మంత్రి సమావేశం నిర్వహించారు. అనంతరం మంత్రి అనిత మీడియాతో మాట్లాడుతూ.. ఈ 12 రోజుల్లో చాలా అంశాలపై పరిశీలన చేశానని, గంజాయి రవాణా రాష్ట్రంలో బాగా పెరిగిందని, నేషనల్‌ క్రైం రికార్డుల్లో ఏపీని మూడో స్థానంలోకి తెచ్చారని అన్నారు. నేటికీ విశాఖ జిల్లాలో ఒక పోలీస్టేషన్‌ రేకుల షెడ్‌లోనే నడుస్తుందని, కేంద్ర, రాష్ట్ర ప్రభుత్వాల నుంచి ఏడాదికి రూ. 50 కోట్లు చొప్పున రూ.250 కోట్లు పోలీసు శాఖకు రావాలని అన్నారు. ఈ ఐదేళ్లల్లో ఈ నిధులు ఎందుకు ఇవ్వలేదని ప్రశ్నించారు.

ఇప్పుడు జీరో నుంచి తాము పని చేయాల్సిన పరిస్థితి ఏర్పడిరదని, ఎస్కార్ట్‌ వాహనాలు కూడా పని చేయడం లేదని తనకు ఫిర్యాదు చేస్తున్నారని మంత్రి అనిత తెలిపారు. 2014 లో ఇచ్చిన వాహనాలే ఇప్పటికీ వాడుతున్నారని ఆశ్చర్యం వ్యక్తం చేశారు. పోలీసు స్టేషన్లలో పేపర్‌, పెన్ను ఖర్చులకు కూడా గత ప్రభుత్వం నిధులు ఇవ్వలేదని మండిపడ్డారు. నిధుల కొరత వల్ల పోలీసులకు విధుల్లో ఇబ్బందులు ఎదురవుతున్నాయన్నారు. హోంశాఖకు ఎంతమేర నిధులు అవసరమో ఒక నివేదిక సిద్దం చేశామని, ప్రాధాన్యత ప్రకారం కేటాయిస్తూ ప్రణాళికలు అమలు చేస్తామన్నారు. నిధుల కొరత వల్ల ఒకేసారి అన్నీ చేయలేమని చెప్పారు. చాలా చోట్ల సిసి కెమెరాలు, ప్రింగర్‌ ప్రింట్‌ స్కానర్‌లు పని చేయడం లేదని, వైసీపీ ప్రభుత్వం వాటిని అసలు పట్టించుకోలేదని హోం మంత్రి అనిత అన్నారు.

నాలుగు అంశాలపై ముందుకు
నాలుగు అంశాలను అజెండాగా పెట్టుకుని ముందుకు వెళ్తున్నామని హోంమంత్రి తెలిపారు. గంజాయి నిర్మూలన, మహిళకు రక్షణ, పోలీసుల సంక్షేమం, పోలీసు శాఖలో ఖాళీల భర్తీకి చర్యలు తీసుకుంటామని తెలిపారు. రెడ్‌బుక్‌ అనేది కక్ష సాధింపుల కోసం కాదన్నారు. గత ప్రభుత్వంలో నిబంధనలకు విరుద్ధంగా పనిచేసిన అధికారులపై చట్టపరంగా చర్యలుంటాయని చెప్పారు. తమకు కక్ష సాధింపు ఉంటే. ఇంతకాలం ఆగుతామా ఆని వ్యాఖ్యానించారు. పగ, ప్రతీకారాల ఆలోచన చేయడం లేదని. తమ నాయకుడు చంద్రబాబు చెప్పిన ప్రకారం రాష్ట్ర ఆభివృద్ధి కోసం పనిచేస్తామని చెప్పారు. విశాఖలో సీపీ కార్యాలయం తాకట్టులో ఉందని, ఎప్పుడు అప్పుల వాళ్లు వస్తారో తెలియదన్నారు.

చంద్రబాబుపై నమ్మకంతో 164 సీట్లు ప్రజలు ఇచ్చారని, మాకు రాష్ట్రం, ప్రజలే ముఖ్యమని.. వారి కోసం పని చేస్తామని స్పష్టం చేశారు. ఇంకా కొన్ని ప్రభుత్వ కార్యాలయాలు తాకట్టులో ఉన్నాయన్నారు. పోలీసులు నిబంధనలు మేరకు పని చేయాలన్నారు. రాజకీయాలు కావాలంటే బయటకి వెళ్లి ఖద్దరు చొక్కాలు వేసుకోవాలని సూచించారు. పోలీసు అంటే ప్రజల కోసం పని చేసే వ్యవస్థ అనేలా పని చేయాలన్నారు. మహిళల మిస్సింగ్‌ కేసులపై దర్యాప్తు చేస్తామన్నారు. రాష్ట్రంలో ఆడపిల్లలు అదృశ్యం అయిన ఘటనలు చాలా ఉన్నాయని, ఇలాంటి సంఘటనలపై ఎవరైనా ఫిర్యాదు ఇచ్చేందుకు వస్తే వారిని కించపరిచేలా అధికారులు మాట్లాడవద్దని సూచించారు. ఏపీలో ప్రతిఒక్కరూ భద్రతగా, భరోసాగా ఉండేలా చేస్తామని హోంమంత్రి పేర్కొన్నారు.

గంజాయి నిర్మూలనకు చర్యలు
గుంజాయి నిర్మూలనపై అవగాహన కార్యక్రమాలు నిర్వహిస్తాం. ఇప్పటికే ఉపసంఘం ఏర్పాటు చేశాం. 100 రోజుల ప్రణాళిక ఏ విధంగా అమలు చేయాలనేదానిపై చర్చిస్తాం. ప్రజల భాగస్వామ్యంతోనే గుంజాయిని ఆరికట్టేందుకు వీలుంటుంది. మంచి ఆలోచనతో పనిచేస్తే విప్లవాత్మక మార్పులు తీసువరావచ్చు. ఎలాంటి శిక్షణ లేకుండా సచివాలయాల్లో మహిళా పోలీసులను నియమించారు. వారు ఏ విధంగా పోలీసు విధులు నిర్వర్తించగలరు. వారి సేవలను ఏ విధంగా వినియోగించుకోవాలనే విషయాన్ని పరిశీలిస్తున్నాం. కలిసికట్టుగా పనిచేసి పోలీసుల పనితీరులో మార్పు తెస్తాం. ప్రజలు ధైర్యంగా పోలీసు స్టేషన్‌కు వెళ్లి బాధలు చెప్పుకునేలా భరోసా ఇవ్వాలి. సిబ్బంది ప్రజలతో మర్యాదగా మెలగాలి. రాష్ట్రంలో పోలీసులు ఉన్నది ప్రతిపక్ష పార్టీ నేతల ఆరెస్టుల కోసమే అన్నట్లుగా గత ప్రభుత్వం వ్యవహరించింది.

ఇకపై ఫ్రెండ్లీ పోలీసింగ్‌ రావాలి సోషల్‌ మీడియాలో నేటికీ నేను బాధితురాలనే. కొంతమంది ఐపీఎస్‌ అధికారుల తీరుతో వ్యవస్థకు చెడ్డపేరు వస్తోంది. గత ప్రభుత్వంలో విచ్చలవిడిగా అక్రమ కేసులు పెట్టారు. నాపైనే 23 కేసులు నమోదు చేశారు. సోషల్‌ మీడియాలో అసభ్యకర పోస్టులపై విచారణ జరిపి చర్చలు తీసుకుంటాం. అక్రమ కేసులపై సీఎం చంద్రబాబుతో చర్చించి నిర్ణయం తీసుకుంటాం. పోలీసులంటే ప్రజల్లో ఒక నమ్మకం, గౌరవం తీసుకొస్తాం. ఏపీలో దిశ చట్టమే లేదు, ఇక ఆ పేరుతో ఏర్పాటైన పోలీసు స్టేషన్ల పేరు హడా మార్చే ఆలోచన చేస్తామని హోం మంత్రి తెలిపాడు.