2024 ఎన్నికలలో చంద్రబాబు నాయుడు గెలుపొందితే ఆంధ్రప్రదేశ్ దేశంలోనే నంబర్ వన్ అవుతుంది అని సూపర్ స్టార్ రజనీకాంత్ పేర్కొన్నారు. ఎన్టీఆర్ శతజయంతి ఉత్సవాల్లో భాగంగా శుక్రవారం రాత్రి విజయవాడలో జరిగిన పుస్తకావిష్కరణ సభలో రజనీకాంత్ ముఖ్యఅతిథిగా పాల్గొన్నారు. ఈ సందర్భంగా రజనీకాంత్ మాట్లాడుతూ రాజకీయం మాట్లాడవద్దని అనుభవం చెబుతున్నా, ఈ సభను చూస్తే మాట్లాడాలి అనిపిస్తుందని చంద్రబాబును ప్రశంసించారు. చంద్రబాబు విజన్ వున్న నాయకుడు. చంద్రబాబు ఘనత దేశ విదేశీ నాయకులకు కూడా తెలుసు.
హైదరాబాద్ ను హై టెక్ నగరంగా మార్చారు అని రజనీకాంత్ చంద్రబాబును ప్రశంసించారు. ఇటీవల చాలాకాలం తర్వాత హైదరాబాద్ ను సందర్శిస్తే తాను న్యూయార్క్ లో వున్ననా? అన్న అనుమానం కలిగిందన్నారు. ఎన్టీఆర్ ఆత్మ చంద్రబాబును దీవిస్తుంది అని పేర్కొన్నారు. ఎన్టీఆర్ ఒక యుగపురుషుడు. ఆరేడు సంవత్సరాల వయసులో పాతాళభైరవి సినిమా చూశా. లవకుశ రజతోత్సవ వేడుకలు ఎన్టీఆర్ ను చూసానని చెప్పారు.
శ్రీకృష్ణ పాండవీయం లో ఎన్టీఆర్ ను చూసి మైమరచి పోయానన్నారు. తాను కండక్టర్ అయ్యాక ఎన్టీఆర్ ను అనుకరించి నటించినట్టు చెప్పారు. అది చూసి తన స్నేహితులు సినీ రంగంలో కి వెళ్లాలని ప్రోత్సహించారన్నారు. తనపై ఎన్టీఆర్ ప్రభావం ఎంతో వుందన్నారు. ఎన్టీఆర్ క్రమశిక్షణ పాటించే వారని చెప్పారు. దానవీరశూరకర్ణ లో ఎన్టీఆర్ లా వుండాలనుకున్నాను. ఎన్టీఆర్ లా మేకప్ వేసుకుని ఫోటో దిగి తన స్నేహితుడికి చూపిస్తే తనను కోతిలా ఉన్నావని హేళన చేసాడని ఆనాటి సంఘటనను గుర్తు చేసుకున్నారు.
