- తేలిన అప్పు రూ.10 లక్షలే..తేలాల్సింది ఇంకా ఉంది
- వాస్తవాలు చెప్పకుండా ప్రజలను తప్పుదోవ పట్టించారు
- ఓటాన్‌ అకౌంట్‌ బడ్జెట్‌పై వైసీపీ నేతలకు అవగాహన లేదు
- వారు ఖాళీ చేసిన ప్రజల జేబులను నింపేలా కూటమి పాలన
- టీడీపీ పొలిట్‌బ్యూరో సభ్యుడు యనమల రామకృష్ణుడు
అమరావతి(చైతన్యరథం): రాజ్యాంగం ప్రకారం శాసనసభ నియమాలకు లోబడి ఓటాన్‌ అకౌంట్‌ బడ్జెట్‌పై తీసుకొచ్చిన ఆర్డినెన్స్‌ చట్టవిరుద్ధమంటూ వైసీపీ నేతలు అవ గాహనా రాహిత్యంతో విమర్శలు చేస్తున్నారని తెలుగుదేశం పార్టీ పొలిట్‌బ్యూరో సభ్యు లు, శాసనమండలి ప్రతిపక్ష నేత యనమల రామకృష్ణుడు ఒక ప్రకటనలో తెలిపారు. ఐదేళ్ల వైసీపీ పాలనలో జరిగిన ఆర్థిక అరాచకత్వం వల్లనే ఆర్డినెన్స్‌ తీసుకురావాల్సిన పరిస్థితి నెలకొందని వివరించారు.
ఒక్కో కుటుంబంపై రూ.7 లక్షల భారం
2019 నుంచి 2024 మధ్య వైసీపీ ప్రభుత్వం పన్నులు, చార్జీల రూపంలో ఒక్కో కుటుంబంపై రూ.7 లక్షల మేర భారం విధించి ప్రజల రక్తాన్ని పీల్చారు. జగన్‌ ముఠా లక్షల కోట్లు స్వంత ఆదాయం పెంచుకున్నారు. రూ.35 వేల కోట్ల విలువైన 1.75 లక్షల ఎకరాలను కబ్జా చేశారు. ఇసుక, ఖనిజ సంపద లూటీ ద్వారా రూ.19 వేల కోట్లు స్వాహా చేశారు. నేడు కూటమి ప్రభుత్వం ప్రజలపై ఎటు వంటి భారాలు లేకుండా అమ లు చేస్తున్న అభివృద్ధి, సంక్షేమ కార్యక్రమాలపై విషం చిమ్మేందుకు కుట్రలు చేస్తున్నారు. 2014`19 మధ్య జీఎస్‌డీపీ 13.5 శాతం కాగా 2019`24 మధ్య అది 10.5 శాతానికి పడిపోయింది. 2014`19తో పోలిస్తే మూలధన వ్యయం జగన్‌ పాలనలో 60 శాతం తగ్గించారు. చంద్రబాబు పాలనలో స్టాంపులు, రిజిస్ట్రేషన్ల ద్వారా వచ్చే ఆదాయం తెలంగాణతో పోలిస్తే ఏపీకి 3.66 శాతం అధికంగా వచ్చేది. జగన్‌ పాలనలో ఏపీ కంటే తెలంగాణాకు 31.65 శాతం పెరగడం జరిగింది. ఇలా అన్ని విధాలా ఆంధ్రప్రదేశ్ జగన్‌ పాలనలో వెనక్కు పోయింది.
వాస్తవాలు చెప్పకుండా తప్పుదోవ పట్టించలేదా?
నాడు శాసనసభకు కూడా వాస్తవాలు చెప్పకుండా వైసీపీ ప్రభుత్వం ప్రజలను తప్పుదోవ పట్టించిన విషయం వాస్తవం కాదా? బడ్జెట్‌లో లేని అప్పులు, పెండిరగ్‌ బిల్లులు, కార్పొరేషన్‌ ద్వారా అప్పులు వంటి విషయాలను ప్రజలకు తెలియకుండా చేసింది వైసీపీ నేతలు కాదా? ఆర్థిక అరాచకత్వంతో వ్యవస్థలు విధ్వంసం చేసి రాష్ట్రాన్ని అన్నివిధాలా వెనక్కు నెట్టారు. ఈ సమయంలో దూరదృష్టితో ముందుకు వెళుతున్న కూటమి ప్రభుత్వంపై తప్పుడు విమర్శలు చేయడం అభివృద్ధిని అడ్డుకోవడమే.
తేలిన అప్పు రూ.10 లక్షల కోట్లు
ఇప్పటికి తేలిన లెక్కల ప్రకారం రూ.10 లక్షల కోట్ల అప్పులు తెచ్చారు. ఇంకా తేలాల్సిన అప్పులు కూడా ఉన్నాయి. ఇన్ని లక్షల కోట్లు అప్పులు చేసి కూడా ఐదేళ్లలో జగన్‌ ప్రభుత్వం ఒక్క సాగునీటి ప్రాజెక్టు కూడా పూర్తి చేయలేదు. 2018`19లో రూ.35,465 కోట్లు ద్రవ్యలోటు ఉండగా, 2022`23 నాటికి రూ.52,508 కోట్లకు చేర్చారు. ప్రభుత్వ కార్యాలయాలు, భూములే కాకుండా రాష్ట్ర సచివాలయాలు సైతం తాకట్టు పెట్టి అప్పులు తెచ్చి చరిత్ర వైసీపీ నేతలది. అడ్డగోలుగా అప్పులు తీసుకువచ్చి ఐదేళ్లలో ఒక్క రోజైనా ఒకటో తేదీ ఉద్యోగులకు వేతనాలు, పింఛన్లు అందజేసిన పాపాన పోలేదు. రాష్ట్ర అభివృద్ధికి దోహదపడే పారిశ్రామిక రంగానికి ఎటువంటి చేయూత నివ్వకపోవడంతో దేశంలోనే అత్యధికంగా 24 శాతం నిరుద్యోగిత రాష్ట్రంలో నమోదు కావడానికి జగన్‌రెడ్డి అండ్‌ కో కారణం కాదా? ఎఫ్‌ఆర్‌బీఎం నిబంధనలను సైతం ఉల్లంఘించి యధేచ్ఛగా అప్పులు తెచ్చారు.
సొంతింటి కలను నిజం చేయబోతున్నాం
జగన్‌ పాలనలో నాలుగు సార్లు భూముల రిజిస్ట్రేషన్‌ విలువను పెంచారు. ఉచిత ఇసుకను రద్దు చేసి పేద, మధ్యతరగతి ప్రజలకు సొంత ఇంటి కలను దూరం చేశారు. నేడు కూటమి ప్రభుత్వం ప్రజల సొంత ఇంటి కలను తీర్చేందుకు రూ.4 లక్షలతో గృహ నిర్మాణానికి సాయం చేస్తోంది. ఇచ్చిన మాట ప్రకారం 16,347 డీఎస్సీ ఉద్యోగాలకు నోటిఫికేషన్‌ ఇచ్చి నిరుద్యోగులకు అండగా నిలిచాం. పింఛన్‌ను రూ.4 వేలకు పెంచడంతో పాటు అన్న క్యాంటీన్లను, రద్దు చేసిన పథకాలను పునరుద్ధరించేందుకు చర్యలు తీసుకుంటున్నామని తెలిపారు.
