రాష్ట్ర భవిష్యత్ కు భరోసాగా మహానాడు

ఎన్టీఆర్ శతజయంతితో నూతనోత్సాహం

దేశ విదేశాలలో ఎన్టీఆర్ శతజయంతి ఉత్సవాలు

కేడర్ లో పెరిగిన కసి, పట్టుదల

చంద్రబాబు నాయకత్వం, లోకేష్ సారథ్యంతో టిడిపికి కొత్త శక్తి

మరో 4 దశాబ్దాల పాటు టిడిపి అజేయ శక్తిగా వుండేలా ప్రణాళిక తెలుగుదేశం పార్టీ వ్యవస్థాపకుడు నందమూరి తారకరామారావు శతజయంతి ఉత్సవాలను గతంలో ఎన్నడూ లేనివిధంగా తెలుగు రాష్ట్రాలతో పాటు దేశ విదేశాలలో ఘనంగా నిర్వహిస్తున్నారు. ఖండాంతరాలు లోని 50 దేశాలు, ప్రాంతాలలో నభూతో నభవిష్యతి అన్న రీతిలో ఎన్టీఆర్ శతజయంతి వేడుకలు, మినీ మహానాడులు నిర్వహించారు. బెంగుళూరు, హైదరాబాద్, అండమాన్ నికోబార్ వంటి ప్రాంతాలలోనూ ఘనంగా వేడుకలు జరిగాయి. తెలంగాణ, ఆంధ్రప్రదేశ్ రాష్ట్రాలలో దాదాపు అన్ని అసెంబ్లీ నియోజకవర్గాల్లోనూ మినీ మహానాడు లు పెద్ద ఎత్తున నిర్వహించారు.

ప్రధానంగా హైదరాబాద్ లో ఈనెల 20 వ తేదీన జరిపిన శతజయంతి వేడుకల్లో పార్టీ అధినేత చంద్రబాబు నాయుడు తో పాటు, రాజకీయ, సినీ రంగాలకు చెందిన హేమాహేమీలు పాల్గొన్నారు. ఈ నెల 28 వ తేదీన ఎన్టీఆర్ జన్మదినం తో ఆ మహనీయుడు ఈ నేలపై జన్మించి నూరు వసంతాలు పూర్తవుతాయి. దీన్ని దృష్టిలో ఉంచుకునే టిడిపి ఆవిర్భావం నుంచి ప్రతి ఏటా ఆనవాయితీగా మే 27,28 తేదీలలో నిర్వహించే మహానాడును పెద్ద ఎత్తున నిర్వహించేందుకు టిడిపి సన్నాహాలు జరుపుతోంది.

రాజమహేంద్రవరంలో జరుపతలపెట్టిన ఈ మహానాడు తో తెలుగుదేశం పార్టీ సత్తా చాటాలని పార్టీ శ్రేణులు ఉవ్విళ్లూరుతున్నాయి. మహానాడు పర్యవేక్షణ కోసం ఏర్పాటు చేసిన 15 కమిటీల కు ఎప్పటి కప్పుడు మార్గదర్శనం చేస్తూ పార్టీ రాష్ట్ర అధ్యక్షుడు కింజరాపు అచ్చన్నాయుడు పర్యవేక్షిస్తున్నారు. పార్టీ లో రాష్ట్ర స్థాయి నాయకుని నుంచి క్షేత్రస్థాయిలో వున్న సామాన్య కార్యకర్త వరకు మహానాడును విజయవంతం చేయాలన్న పట్టుదల, కసి తో పనిచేస్తున్నారు.

రాష్ట్ర భవిష్యత్ కు దోహదపడే విధంగా మహానాడులో చేపట్టనున్న తీర్మానాలపై యనమల రామకృష్ణుడు నేతృత్వంలో కమిటీ కసరత్తు పూర్తి చేసింది. మహానాడులో 19 తీర్మానాలు చేసి అవకాశం ఉంది. ఆ తీర్మానాల ముసాయిదాను పార్టీ అధినేత చంద్రబాబు అధ్యక్షతన జరిగే పార్టీ పొలిట్ బ్యూరో సమావేశంలో చర్చించి ఆమోదముద్ర వేయాల్సి వుంటుంది. తెలుగుదేశం పార్టీ జాతీయ ప్రధాన కార్యదర్శి నారా లోకేష్ జరుపుతున్న యువగళం పాదయాత్రలో వివిధ వర్గాల ఎదుర్కొంటున్న సమస్యలు స్వయంగా చూసారు. ఆయా వర్గాలు నుంచి స్వీకరించిన వినతులు, లోకేష్ పరిశీలనలో వెల్లడైన అంశాలను పరిగణలోకి తీసుకొని మహానాడు తీర్మానాలలో పొందుపరచే అవకాశం వుంది. రానున్న ఎన్నికలకు సంబంధించి పార్టీ ప్రకటించనున్న మేనిఫెస్టో కు మహానాడు తీర్మానాలు ఒక దిక్సూచిగా నిలువనున్నాయి.

ఎన్టీఆర్ జయంతి ఉత్సవాలు, చంద్రబాబు నాయుడు తలపెట్టిన ఇదేం ఖర్మ మన రాష్ట్రానికి కార్యక్రమ పర్యటనలు, పార్టీ జాతీయ ప్రధాన కార్యదర్శి నారా లోకేష్ జరుపుతున్న యువగళం పాదయాత్ర లతో తెలుగుదేశం పార్టీ కేడర్ లో నూతనోత్సాహం ఉరకలేస్తోంది. ఇదే ఉత్సాహాన్ని రానున్న ఎన్నికల వరకు కొనసాగించే దిశగా పార్టీ అధినేత చంద్రబాబు నిరంతర కార్యక్రమాలతో ప్రణాళిక రూపొందించారు. రానున్న ఎన్నికలలో టిడిపి అధికారంలోకి రావటంతో పాటు మరో నాలుగు దశాబ్దాల పాటు అజేయంగా వుండేలా చంద్రబాబు తీర్చిదిద్దుతున్నారు.

ఆ క్రమంలోనే పార్టీలో ఆవిర్భావ సమయం నుంచి వున్న సీనియర్ నాయకుల తో పాటు యువతకు సైతం తగు ప్రాధాన్యత ఇవ్వాలని నిర్ణయించారు. ఆ దృష్టితోనే రానున్న ఎన్నికలలో 40 శాతం టికెట్ లు యువతకు కేటాయించాలనే దిశగా పార్టీ లో చర్చ జరుగుతున్నది. పార్టీ ఆవిర్భావం తర్వాత మునుపెన్నడూ లేనంత క్లిష్ట పరిస్థితిలో తెలుగుదేశం వుంది. ఈ స్థితిలో చంద్రబాబు దూరదృష్టి, చాణక్యం తో పాటు లోకేష్ పోరాట పటిమ లు తెలుగుదేశం పార్టీకి రక్షా కవచంగా నిలిచాయి. రానున్న ఎన్నికలు రాష్ట్ర మనుగడ, భవిష్యత్ ను మలుపు తిప్పేవి అనటంలో సందేహమే లేదు. చంద్రబాబు నాయకత్వంలో లోకేష్ సారథ్యంలో రాష్ట్ర భవిష్యత్ కు భరోసా లభించినట్టయింది. తెలుగుదేశం పార్టీకి అధికారంతో పాటు రాష్ట్ర భవిష్యత్ దేదీప్యమానంగా వెలుగొందే శుభగడియల కోసం యావత్ తెలుగుజాతి వేయికళ్లతో ఎదురుచూస్తోంది.