అతడే ఓ సైన్యం!

• తాత మహానాయకుడు..
• తండ్రి దార్శనికుడు..
• ఇరువురి పేరు నిలిపేలా.. లోకేష్‌
• సంచలనాలు సృష్టిస్తోన్న తెలుగు’తేజం

అమరావతి (చైతన్యరథం): ఎండా వానా.. చలీ వడగాలీ.. అతని సంకల్పాన్ని నిరోధించలేకపోయాయి. వారమో, నెలో కాదు.. 226 రోజులపాటు 3132 కిలోమీటర్ల యువగళం పాదయాత్ర. అతడే ఓ సైన్యమయ్యాడు. పల్లెపల్లెకూ వెళ్లి పార్టీ శ్రేణుల్లో చైతన్య ఊపిర్లూదాడు. ప్రజల మనిషిగా ఎదిగాడు. అతడే.. మహానాయకుడి మనుమడు. దార్శనికుడి సుపుత్రుడు. యువనేత నారా లోకేష్‌. ఇపుడు తెలుగుదేశం పార్టీ కార్యక్రమాలకు కర్త, కర్మ, క్రియ అతనే. కార్యకర్తల సంక్షేమమే లక్ష్యంగా ఆ విభాగం బాధ్యతలు తీసుకుని పార్టీలో తన ప్రస్థానాన్ని విస్తరిస్తున్నాడు లోకేష్‌. టీడీపీ జాతీయ ప్రధాన కార్యదర్శిగా తనదైన శైలిలో పార్టీ బలోపేతానికి కృషి చేశాడు. ఎమ్మెల్సీగా ఎన్నికై, మంత్రి పదవి చేపట్టి మూడుశాఖలను ప్రగతిపథంలో పరుగులు పెట్టించాడు. ప్రత్యక్ష రాజకీయాల్లో మంగళగిరి నియోజకవర్గంనుంచి 2019లో పోటీ చేసి 5 వేలు పైచిలుకు ఓట్ల తేడాతో ఓడిపోయాడు. తనను ఆదరించలేదని నియోజకవర్గాన్ని వదిలిపోలేదు. ఓడినచోటే గెలవాలనే పట్టుదలతో పడిలేచిన కెరటమయ్యాడు.

మంగళగిరి సెగ్మెంట్‌లో ప్రజలకు చేరువై సొంత నిధులతో 29 సంక్షేమ పథకాలు అమలు చేస్తున్నాడు. ప్రజల హృదయాలనే కాదు… నియోజకవర్గంలోనూ అత్యధిక మెజార్టీతో గెలిచి చరిత్ర సృష్టించారు. ‘సమాజమనే దేవాలయంలో ప్రజలే దేవుళ్లు’ అన్న తాత నినాదం, విజనున్న నాన్న విధానం పుణికిపుచ్చుకున్న నారా లోకేష్‌ `తెలుగుదేశం పార్టీని మరో 30 ఏళ్లపాటు తిరుగులేని ప్రజాశక్తిగా నడిపించగల దమ్ము ధైర్యం ఉన్న నేతగా వేనోళ్ల కీర్తిని అందుకుంటున్నాడు.నారా చంద్రబాబునాయుడు, భువనేశ్వరి దంపతులకు 1983 జనవరి 23న జన్మించాడు లోకేష్‌ నాన్నది నారావారి పల్లె. అమ్మది నిమ్మకూరు. బాల్యమంతా హైదరాబాద్‌లోనే గడిచింది. భారతీయ విద్యాభవన్స్‌ పబ్లిక్‌ స్కూల్‌, విద్యాశ్రమ్‌లో ప్రాథమిక విద్యాభ్యాసం పూర్తిచేశారు. హైదరాబాద్‌లోని లిటిల్‌ ఫ్లవర్‌ జూనియర్‌ కాలేజీలో ఇంటర్మీడియెట్‌ పూర్తి చేశారు.
అమెరికాలోని స్టాన్‌ఫోర్డ్‌ యూనివర్సిటీలో ఎంబీఏ చేశారు. అమెరికాలో కార్నెగీ మెలన్‌ వర్సిటీలో బీఎస్సీ మేనేజ్మెంట్‌ ఇన్ఫర్మేషన్‌ సిస్టమ్‌ డిగ్రీ పొందారు. హెరిటేజ్‌ ఫుడ్స్‌ వైస్‌ ప్రెసిడెంట్‌గా, హెరిటేజ్‌ ఫిన్‌లీజ్‌ లిమిటెడ్‌ నాన్‌ ఎగ్జిక్యూటివ్‌ డైరెక్టర్‌గా పనిచేశారు. వరల్డ్‌ బ్యాంకు మద్దతుతో వివిధ దేశాల్లో అమలయ్యే కెపాసిటీ బిల్డింగ్‌ ప్రాజెక్ట్స్‌, ఈ గవర్నెన్స్‌, కనెక్టివిటీ సొల్యూషన్స్‌ అంశాలలో ప్రాజెక్టు మేనేజర్‌గా (2004-2006) పనిచేసిన నారా లోకేష్‌ స్వదేశానికి చేరుకున్నారు.
2013లో పూర్తిస్థాయి రాజకీయరంగ ప్రవేశంచేసి, 2014 టీడీపీ అధికారంలోకి రావడంలో కీలకపాత్ర వహించారు. 2024లో టీడీపీి కూటమి అధికారంలోకి రావడంలో నారా లోకేష్‌ పోషించిన పాత్ర ఎనలేనిది. మంగళగిరి నియోజకవర్గం ఎమ్మెల్యేగా ఎన్నికై 39ఏళ్లుగా అందని నియోజకవర్గంపై టీడీపీ జెండా ఎగురవేశాడు. టీడీపీ సభ్యత్వాల ద్వారా ప్రమాదబీమా, కార్యకర్తల సంక్షేమనిధి ఏర్పాటు చేసిన నారా లోకేష్‌, ఎన్టీఆర్‌ ట్రస్ట్‌ ద్వారా విద్య- వైద్య సేవలు అందిస్తున్నారు. టీడీపీ నాయకత్వ శిక్షణ శిబిరాల ద్వారా 25 వేలమంది యువనాయకుల్ని తయారు చేసిన కార్యక్రమ రూపకర్త కూడా నారా లోకేషే.

2015లో టీడీపీ జాతీయ ప్రధాన కార్యదర్శిగా నియమితులై 2018లో ఎమ్మెల్సీగా ఎన్నికయ్యారు. 2018లో ఐటీ -ఎలక్ట్రానిక్స్‌, పంచాయతీరాజ్‌, గ్రామీణాభివృద్ధి శాఖల మంత్రిగా బాధ్యతలు నిర్వర్తించారు. 30ఏళ్ల వయస్సులోనే ముఖ్యమైన 3శాఖల మంత్రిగా నారా లోకేష్‌ చేసిన కృషికి జాతీయ, అంతర్జాతీయ, స్కోచ్‌ అవార్డులు దక్కాయి. ‘ఏ పొలిటికల్‌’ అనే సంస్థ ప్రకటించిన జాబితాలో ప్రపంచంలోనే అత్యంత ప్రభావవంతమైన యువ నాయకుల్లో మొదటి 20 స్థానాల్లో నిలిచిన ఏకైక భారతీయుడు నాటి ఏపీ మంత్రి నారా లోకేష్‌. ప్రభుత్వ కార్యక్రమాల అమలులో వినూత్న ఆలోచనలు, పాలనలో టెక్నాలజీ వినియోగం, ప్రజలకు మెరుగైన సదుపాయాలు కల్పించడంపై నారా లోకేష్‌కి సింగపూర్‌ విదేశీ వ్యవహారాల మంత్రిత్వశాఖ.. ఎస్‌ఆర్‌ నాథన్‌ ఫెలోషిప్‌ ప్రకటించటం విశేషం.
ప్రజల కోసం, రాష్ట్ర ప్రగతి కోసం అహరహం శ్రమిస్తున్న తెలుగుదేశం పార్టీ యువతేజం నారా లోకేష్‌. స్వచ్ఛరాజకీయాలకు బ్రాండ్‌ అంబాసిడర్‌ అనడం అతిశయోక్తి కాదు. అభివృద్ధి, సంక్షేమం, ఉపాధి కల్పన, విద్య, వైద్య, మౌలిక, పారిశ్రామిక, వ్యవసాయ రంగాలపై స్పష్టమైన విజన్‌తో ఉన్న నారా లోకేష్‌… తాతకుతగ్గ మనవడు, తండ్రినిమించే తనయుడిగా ప్రజల మన్ననలు అందుకుంటున్నాడు.

రాజకీయ పద్మవ్యూహాన్ని ఛేదించిన సవ్యసాచి
స్టాన్‌ ఫోర్డులో చదివిన సాఫ్ట్‌ కుర్రాడు లోకేష్‌ చుట్టూ ఫ్యాక్షన్‌ పద్మవ్యూహం పన్నేద్దాం, అభిమన్యుడిలా చుట్టేద్దాం అనుకుంది జగనాసుర ముఠా. కుట్రలు, కుతంత్రాలు, తప్పుడు కేసులు -దాడులకి ఎదురొడ్డి నిలిచిన నారా లోకేష్‌ అభిమన్యుడు కాదు, అర్జునుడని అర్థం చేసుకోడానికి వైసీపీకి ఎంతోకాలం పట్టలేదు. క్రియాశీల రాజకీయాల్లో లోకేష్‌ ప్రవేశించిన నుంచీ.. అవినీతి ఆరోపణల్లేవు, ఇతరత్రా కేసులు ఏవీ లేవు. వైసీపీ అధికారంలోకి వచ్చాక 22 తప్పుడు కేసులు బనాయించారు. హత్యకి గురైన విద్యార్థిని కుటుంబాన్ని పరామర్శించేందుకు వెళితే కేసు, ట్రాక్టర్‌ నడిపాడని ఓ కేసు, కోవిడ్‌ గైడ్‌లైన్స్‌ ఉల్లంఘించాడని మరో కేసు.. స్టూలు ఎక్కి మాట్లాడాడని ఇంకో కేసు.. ఇలా కేసుల మీద కేసులు బనాయించారు. యువగళం పాదయాత్ర ఆరంభం నుంచీ అడ్డుకునేందుకు వైసీపీ సర్కారు చేయని ప్రయత్నంలేదు. భద్రత కుదించారు. ఉన్న పోలీసులు మైకు, స్టూలు లాక్కోవడం, మాట్లాడటానికి వీల్లేదని నోటీసులు ఇవ్వడం, కేసులు బనాయించడం చేశారు. మొదట్లోనే సాగనిస్తే పాదయాత్ర.. సాగనివ్వకుంటే దండయాత్ర అంటూ ప్రకటించిన నారా లోకేష్‌ ముందుకు సాగారు. ఓవైపు తనపై కేసులు, మరోవైపు తండ్రి అక్రమ అరెస్టు, ఇంకోవైపు టీడీపీ నేతలు -కార్యకర్తలపై తప్పుడు కేసులు. బెదిరిపోలేదు లోకేష్‌. న్యాయపోరాటాన్ని నమ్ముకున్నాడు.

ఢిల్లీలో మకాం వేసి న్యాయకోవిదులతో చర్చలు, మరోవైపు కేంద్రంతో అప్పుడే పొత్తు ఎత్తులు ముగించి వచ్చాడు. తాత ధైర్యం, తండ్రి దార్శనికత, మేనమామ దూకుడు కలగలిసిన నారా లోకేష్‌ జగనాసుర రాజకీయ పద్మవ్యూహాన్ని ఛేదించిన సవ్యసాచి. అభిమన్యుడు అనుకున్న వైసీపీ గ్యాంగుకి అర్జునుడిలా తయారయ్యాడు. టీడీపీ లీడర్లకి ధైర్యం, కేడర్‌కి అండ, పొత్తుల ఎత్తులు, అధికార అహంకారానికి ఎదురొడ్డి పోరాడి అభినవ అర్జునుడిగా రాజకీయ కురుక్షేత్రంలో కూటమిని విజయతీరాలకు చేర్చాడు. తెలుగుదేశం పార్టీని 30 ఏళ్లపాటు నిరంతరంగా నడిపించే రథసారథిóగా నిలిచాడు.