- దేవాదాయ ఏసీగా పనిచేస్తున్న నా భార్యను లోబర్చుకొని రూ.1500 కోట్ల భూములు కొల్లగొట్టారు
- విజయసాయి రెడ్డిపై పోరాడుతున్నందుకు నన్ను బదిలీ చేయించారు
- నాకు న్యాయం చేయాలి
- మంత్రి నారా లోకేష్కు కళింగిరి శాంతి భర్త మదన్ మోహన్ వినతి
అమరావతి (చైతన్యరథం): వైసీపీ ఎంపీ విజయసాయిరెడ్డి తన భార్యను లోబర్చుకొని విశాఖపట్నంలో రూ.1500 కోట్ల విలువైన భూములు కొల్లగొట్టారని, ఆయన అక్రమాలు, అసాంఘిక కార్యకలాపాలపై పోరాడుతున్నందుకు తనను ఇటీవల హైదరాబాద్ నుంచి కోల్కతాకు బదిలీ చేయించారని సస్పెన్షన్కు గురైన దేవాదాయశాఖ అసిస్టెంట్ కమిషనర్ కళింగిరి శాంతి భర్త మదన్ మోహన్ ఆవేదన వ్యక్తంచేశారు. ఉండవల్లి నివాసంలో మంగళవారం ప్రజాదర్బార్కు విచ్చేసిన మదన్ మోహన్… మంత్రి లోకేష్ను కలిసి తన గోడును వెళ్లబోసుకున్నారు.
తాను ఇండియన్ ఇనిస్టిట్యూట్ ఆఫ్ ప్యాకింగ్ (ఐఐపి)లో అసిస్టెంట్ డైరెక్టర్గా పనిచేస్తున్నానని, ఎంపీ విజయసాయి రెడ్డి, అడ్వకేట్ సుభాష్ కలసి తన భార్య కళింగిరి శాంతిని లోబర్చుకొని విశాఖలో ఆర్కే బీచ్ నుంచి భీమిలి వరకు పెద్దఎత్తున భూములు కొల్లగొట్టారని మదన్ మోహన్ పేర్కొన్నారు. 2022-23 నడుమ తనను ఏమార్చి అమెరికా పంపిన విజయసాయి.. తన భార్య శాంతితో రహస్యంగా సహజీవనం చేసి మగబిడ్డను కన్నారని తెలిపారు.
తాను స్థానికంగా లేని సమయంలో జన్మించిన బిడ్డకు విజయసాయిరెడ్డే తండ్రి అని తాను గట్టిగా విశ్వసిస్తున్నానని చెప్పారు. తనకు న్యాయం చేయాల్సిందిగా రాష్ట్రపతి, ప్రధాని కార్యాలయాలతో పాటు రాష్ట్ర హోంమంత్రిని, డీజీపీలను కలిసి విన్నవించుకున్నా ఇప్పటివరకు తనకు న్యాయం జరగలేదని ఆవేదన వ్యక్తం చేశారు. విజయసాయిరెడ్డికి డీఎన్ఏ పరీక్షలు నిర్వహించి శాంతికి కలిగిన బిడ్డకు తండ్రి ఎవరో తేల్చాలని మంత్రి లోకేష్ను మదన్ మోహన్ కోరారు. గత ప్రభుత్వ హయాంలో శాంతి దేవాదాయ శాఖ అసిస్టెంట్ కమిషనర్గా పనిచేసిన కాలంలో రూ.20 కోట్లకు పైగా అక్రమాస్తులు సంపాదించినట్లు తెలిపారు. కుంచనపల్లిలో రూ.4కోట్ల విలువైన విల్లా, జగన్ ఇంటి సమీపంలో రూ.3కోట్ల విలువైన ఇల్లు, విశాఖ సాగర్ నగర్లో ట్రిపుల్ బెడ్ రూమ్ ఫ్లాట్ తోపాటు ఆమెకు విలాసవంతమైన కార్లు కూడా ఉన్నాయని పేర్కొన్నారు. విశాఖలో విజయసాయి, సుభాష్, తన భార్య శాంతి కలిసి కొట్టేసిన రూ.1500 కోట్ల విలువైన భూములపై విచారణ జరిపి బాధ్యులపై చర్యలు తీసుకోవాలని, విజయసాయి కుట్రతో కోల్కతా బదిలీ అయిన తనను తిరిగి హైదరాబాద్కు ట్రాన్స్ఫర్ చేయించాలని మదన్ మోహన్ విన్నవించారు. ఉన్నతాధికారులతో మాట్లాడి న్యాయం చేస్తామని మంత్రి లోకేష్ హామీ ఇచ్చారు.
