టిడిపి మహానాడు ప్రాంగణానికి భూమిపూజ

నభూతో నభవిష్యత్ అన్నట్లుగా ఎన్టీఆర్ శతజయంతి ఉత్సవాలు

జగన్ పాలనకు రాజమహేంద్రవరం వేదికగా చరమగీతం

మహానాడుకు లక్షలాదిగా తరలిరండి

టిడిపి రాష్ట్ర అధ్యక్షులు అచ్చెన్నాయుడు పిలుపు

భూమిపూజకు తరలివచ్చిన టిడిపి ముఖ్య నేతలు

…….
తెలుగుదేశం మహానాడు,2023 ప్రాంగణ నిర్మాణానికి శుక్రవారం నాడు పవిత్ర గోదావరి నదీ తీరాన రాజమహేంద్రవరంలో శ్రీకారం చుట్టారు. తెలుగుదేశం రాష్ట్ర అధ్యక్షులు కింజరాపు అచ్చెన్నాయుడు
శుక్రవారం ఉదయం 9.25 గంటలకు రాజమహేంద్రవరం శివారు వేమగిరిలో జాతీయ రహదారి పక్కన మహానాడు వేదిక నిర్మాణానికి భూమిపూజ చేశారు. టిడిపి రాష్ట్ర మాజీ అధ్యక్షులు కిమిడి కళా వెంకట్రావు, రాజమహేంద్రవరం రూరల్ ఎమ్మెల్యే, టిడిపి పొలిట్ బ్యూరో సభ్యులు గోరంట్ల బుచ్చయ్య చౌదరి, రాజమహేంద్రవరం సిటీ ఎమ్మెల్యే ఆదిరెడ్డి భవానీ, ఎమ్మెల్సీలు దువ్వారపు రామారావు, పి. అశోక్ బాబు, టిడిపి పొలిట్ బ్యూరో సభ్యులు నిమ్మకాయల చినరాజప్ప, చింతకాయల అయ్యన్నపాత్రుడు, కొల్లు రవీంద్ర, దేవినేని ఉమామహేశ్వరరావు, బీదా రవిచంద్ర యాదవ్, టిడిపి జాతీయ అధికార ప్రతినిధి బొండా ఉమామహేశ్వరరావు, రాష్ట్ర టిడిపి ఉపాధ్యక్షులు జ్యోతుల నెహ్రూ, గొల్లపల్లి సూర్యారావు, శాసనమండలి మాజీ డిప్యూటీ ఛైర్మన్ రెడ్డి సుబ్రహ్మణ్యం, తూర్పుగోదావరి జిల్లా టిడిపి అధ్యక్షులు కె.ఎస్. జవహర్, మాజీ ఎమ్మెల్సీ ఆదిరెడ్డి అప్పారావు, కాకినాడ జిల్లా టిడిపి అధ్యక్షులు జ్యోతుల నవీన్, అమలాపురం పార్లమెంట్ టిడిపి ఇంఛార్జి గంటి హరీష్ బాలయోగి, తెలంగాణ తెలుగుయువత అధ్యక్షులు పొగాకు జయరాం చందర్, టిడిపి రాష్ట్ర కార్యనిర్వాహక కార్యదర్శి శిష్ట్లా లోహిత్, మాజీ ఎమ్మెల్యేలు పెందుర్తి వెంకటేష్, బూరుగుపల్లి శేషారావు, ఎస్.వి.ఎస్.ఎన్.వర్మ, నల్లమిల్లి రామకృష్ణారెడ్డి, దాట్ల బుచ్చిబాబు, పిల్లి అనంతలక్ష్మి, టిడిపి నాయ దామచర్ల సత్య, చెల్లుబోయిన శ్రీనివాస్, కుడుపూడి సత్తిబాబు, వీరవల్లి శ్రీనివాస్, ఎంవిఎస్ చౌదరి, నామన రాంబాబు, డొక్కా నాధబాబు, గన్ని కృష్ణ, కాశి నవీన్ కుమార్, తెలుగుమహిళ నాయకులు మజ్జి పద్మ, యార్లగడ్డ సుచిత్ర, భీమనేని వందనాదేవి, సత్యవాణి, టి.ఎన్.టి.యు.సి అధ్యక్షులు గొట్టుముక్కల రఘురామరాజు తదితరులు ఈ భూమిపూజ కార్యక్రమంలో పాల్గొన్నారు.

ఈ సందర్భంగా టిడిపి రాష్ట్ర అధ్యక్షులు కింజరాపు అచ్చెన్నాయుడు మాట్లాడుతూ రాజమహేంద్రవరంలో టిడిపి మహానాడు నభూతో నభవిష్యత్ అన్న చందంగా నిర్వహిస్తామని తెలిపారు. 27వ తేదీన 15 వేల మంది ప్రతినిధులతో తెలుగుదేశం మహానాడు నిర్వహిస్తామని, 28వ తేదీన తెలుగుదేశం వ్యవస్థాపకులు స్వర్గీయ నందమూరి తారక రామారావు శతజయంతి ఉత్సవాల ముగింపు 15 లక్షల మందితో ఘనంగా నిర్వహిస్తామని ఆయన ప్రకటించారు. ఇప్పటికే తెలుగు రాష్ట్రాలలో ఎన్టీఆర్ శత జయంతి 100 సభలు నిర్వహించామని తెలిపారు. తొలిరోజు ప్రతినిధుల సభలో వైసీపీ పాలనకు వ్యతిరేకంగా 15 తీర్మానాలు ప్రవేశపెడతామని తెలిపారు. జగన్ అరాచక పాలన, అవినీతి, మైన్స్, శాండ్, ప్రకృతి వనరుల దోపిడీకి వ్యతిరేకంగా తీర్మానాలు చేస్తామని ప్రకటించారు.

తెలుగుదేశం మహానాడు ఘనంగా నిర్వహించేందుకు టిడిపి శ్రేణులు సిద్ధమవుతుంటే, వైసీపీ కవ్వింపు చర్యలకు దిగుతోందని అచ్చెన్నాయుడు ఆరోపించారు. రాజమండ్రి ఎంపీ మార్గాని భరత్ ఈ నెలాఖరు వరకు రాజమండ్రి సిటీతో పాటు పరిసర ప్రాంతాల హోర్డింగులన్నీ బ్లాక్ చేసి, టిడిపి వారికి బోర్డులు ఇవ్వరాదని అడ్వర్టయిజ్మెంట్ ఏజెన్సీలకు హుకుం జారీ చేయడాన్ని ఆయన తప్పుబట్టారు. వైసీపీ కవ్వింపు చర్యలు ఆపకపోతే ప్రజలలో తిరుగుబాటు తప్పదని ఆయన హెచ్చరించారు. మహానాడు విజయవంతంగా నిర్వహించేందుకు రాష్ట్ర కమిటీలు వేశామని, జిల్లా స్థాయిలో కూడా కమిటీలు వేసి అందరి సహకారం తీసుకుంటామని చెప్పారు.

రాష్ట్ర టిడిపి మాజీ అధ్యక్షులు కిమిడి కళా వెంకట్రావు మాట్లాడుతూ తెలుగుదేశం అధినేత ఎన్టీఆర్ తెలుగువాడి ఆత్మగౌరవాన్ని ఢిల్లీకి చాటిచెబితే, ప్రస్తుత ముఖ్యమంత్రి జగన్ ఢిల్లీ పెద్దల కాళ్ళ మీద పడి తెలుగువారి ఆత్మగౌరవాన్ని తాకట్టు పెడుతున్నాడని మండిపడ్డారు. రాష్ట్రంలో జగన్ పాలన పోవాలి. మళ్ళీ చంద్రబాబు పాలన రావాలి. అని ప్రజలు ఎదురు చూస్తున్నారని అన్నారు. దళిత, బలహీన వర్గాల సంక్షేమం కోసం చంద్రబాబు పాలన రావాలన్నారు. జగన్ పార్టీని బంగాళాఖాతంలో కలిపేందుకు ఈ మహానాడు నాంది పలుకుతుందన్నారు.

రాజమహేంద్రవరం రూరల్ ఎమ్మెల్యే గోరంట్ల బుచ్చయ్య చౌదరి మాట్లాడుతూ. భారతదేశ చరిత్రలోనే మహానాడు ఒక అపూర్వ అధ్యాయం అని అభివర్ణించారు. అన్న ఎన్టీఆర్ జన్మదినాన్ని మహానాడు పండుగగా జరుపుకోవడం తెలుగు ప్రజలందరికీ ఆనందదాయకమని అన్నారు. మహానాడు ఆతిథ్యానికి సిద్ధంగా ఉన్నామని, గోదావరి పుష్కరాలకు వచ్చిన అతిధులను ఆదరించిన మాదిరి అందరినీ ఆదరిస్తామని తెలిపారు. రాజమండ్రి సిటీ, రూరల్ నియోజకవర్గాల పరిధిలో కూడా మహానాడు కమిటీలు వేస్తామని, అందరూ ఈ పండుగ విజయవంతంలో భాగస్వాములు కావాలని కోరారు.

పెద్దాపురం

ఎమ్మెల్యే, టిడిపి పొలిట్ బ్యూరో సభ్యులు నిమ్మకాయల చినరాజప్ప మాట్లాడుతూ మహానాడు కార్యక్మర్తల పండుగ అని, మహానాడు, ఎన్టీఆర్ వందవ పుట్టిన రోజు వైభవంగా నిర్వహించేందుకు ఉభయ గోదావరి జిల్లాలు సిద్ధంగా ఉన్నాయని తెలిపారు. జగన్ ను తరిమికొట్టి, చంద్రబాబును సిఎం చేస్తామని ప్రజలే చెబుతున్నారని అన్నారు. జగన్ ఓటమే ధ్యేయంగా విపక్షాలు పని చేస్తున్నాయని, జనసేనాని పవన్ కళ్యాణ్ కూడా వైసీపీ వ్యతిరేక ఓటు చీలకుండా చూస్తామని ప్రకటించారని ఒక విలేఖరి అడిగిన ప్రశ్నకు సమాధానంగా రాజప్ప చెప్పారు.

మాజీ మంత్రి దేవినేని ఉమామహేశ్వరరావు

మాట్లాడుతూ… పవిత్ర గోదావరి తీరం మహానాడుకు సిద్ధమవుతోందని, లక్షలాదిగా జనం తరలి వచ్చి విజయవంతం చేయాలని కోరారు.