- ఆగస్ట్‌ నెలకు 64.82లక్షల పింఛన్లకు రూ.2737.41 కోట్లు విడుదల
- తొలిరోజునే 96శాతం, రెండోరోజు నూరు శాతం పంపిణీ పూర్తవ్వాలి
- పంపిణీ ప్రక్రియలో జిల్లా కలెక్టర్లు పాల్గొనాలి
- అక్రమాలకు పాల్పడే సిబ్బందిపై కఠిన చర్యలు
- జిల్లా కలెక్టర్లకు సీఎస్‌ ఆదేశంఅమరావతి (చైతన్యరథం): ఆగస్ట్‌ 1వ తేదీన ఉదయం 6గంటలకే ఎన్ట్టీఆర్‌ భరోసా పింఛన్ల పంపిణీ కార్యక్రమాన్ని చేపట్టడంతో పాటు అదే రోజున 96శాతం పైగా పంపిణీ ప్రక్రియను పూర్తి చేయాలని అన్ని జిల్లాల కలెక్టర్లకు రాష్ట్ర ప్రభుత్వ ప్రధాన కార్యదర్శి (సీఎస్‌) నీరభ్‌కుమార్‌ ప్రసాద్‌ స్పష్టం చేశారు. పింఛన్ల పంపిణీపై మంగళవారం రాష్ట్ర సచివాలయం నుండి జిల్లాల కలెక్టర్లతో సీఎస్‌ వీడియో సమావేశం నిర్వహించారు. ఈ సందర్భంగా ఆయన మాట్లాడుతూ ఆగస్ట్‌ నెలకు సంబంధించి వివిధ రకాలకు చెందిన 64 లక్షల 82 వేల 52 పింఛన్ల పంపిణీకి రూ.2,737.41 కోట్లను విడుదల చేశామన్నారు. ఈ మొత్తాన్ని బుధవారం మధ్యాహ్నం లోగా డ్రా చేసేందుకు తగు చర్యలు తీసుకోవాలని కలెక్టర్లకు స్పష్టం చేశారు. గ్రామ, వార్డు సచివాలయ సిబ్బంది 1వ తేదీన ఇంటింటికీ వెళ్ళి 96 శాతం పింఛన్ల్ల పంపిణీ పూర్తి చేయాలన్నారు.
- 2వ తేదీన నూరు శాతం పింఛన్ల పంపిణీ పూర్తి చేయాలని ఆదేశించారు. పింఛన్ల పంపిణీ కార్యక్రమంలో జిల్లా కలెక్టర్లు స్వయంగా పాల్గొనాలని సీఎస్‌ ఆదేశించారు.
పింఛన్ల పంపిణీకి సంబంధించి జూలై నెలలో పశ్చిమ గోదావరి, కడప, అనంతపురం జిల్లాల్లో జరిగిన సంఘటనలు పునరావృతం కాకుండా కట్టుదిట్టమైన చర్యలు తీసుకోవాలని జిల్లా కలెక్టర్లను సీఎస్‌ ఆదేశించారు. ఆ సంఘటనలకు సంబంధించి బాధ్యులపై ఇప్పటికే క్రిమినల్‌ కేసులు నమోదు చేయడంతో పాటు వారిని విధుల నుండి సస్పెండ్‌ చేసినందున తదుపరి క్రమశిక్షణా చర్యలు కూడా తీసుకోవాలని స్పష్టం చేశారు. పింఛన్ల పంపిణీలో అక్రమాలకు పాల్పడే వారిపై కఠినంగా వ్యవహరించాలని ఆదేశించారు.
ఈ సమావేశంలో వర్చువల్‌ గా పాల్గొన్న రాష్ట్ర పంచాయితీ రాజ్‌, గ్రామీణాభివృద్ధి శాఖ ముఖ్య కార్యదర్శి శశిభూషణ్‌ కుమార్‌ మాట్లాడుతూ పింఛన్ల పంపిణీకి సంబంధించి అన్ని చర్యలు తీసుకుంటున్నామన్నారు. ఇప్పటికే జిల్లా కలెక్టర్లకు తగు ఆదేశాలు జారీ చేశామని వివరించారు. జూలై నెలలో పింఛన్ల పంపిణీకి సంబంధించి సర్వర్‌ డౌన్‌ కావడంతో ఆధార్‌ అధంటిఫికేషన్లో కొన్ని ఇబ్బందులు ఎదురయ్యాయని, వాటిని అధిగమించేందుకు యుఐడిఎఐ అధికారుల సమన్వయంతో తగిన చర్యలు తీసుకుంటామన్నారు. ఈ సమావేశంలో సెర్ప్‌ సీఈఓ జి.వీరపాండ్యన్‌, ఆర్థిక శాఖ అదనపు కార్యదర్శి జె.నివాస్‌, జిల్లా కలెక్టర్లు, డీఆర్డీఏ పీడీలు, తదితరులు పాల్గొన్నారు.
