- కౌంటింగ్‌ కేంద్రాల్లో ఏజెంట్లు అప్రమత్తంగా వ్యవహరించాలి
- ఓట్ల లెక్కింపులో అనుమానం వస్తే వెంటనే ఆర్వోకు ఫిర్యాదు చేయాలి
- పోస్టల్‌ బ్యాలెట్‌ ఓట్లపై రాద్ధాంతం చేస్తున్న వైసీపీకి సుప్రీంకోర్టులోనూ మొట్టికాయలే
- కౌంటింగ్‌లో హింసకు వైసీపీ కుట్ర
- కూటమి కౌంటింగ్‌ ఏజెంట్లు సంయమనం కోల్పోవద్దు
- నిబంధనలు అమలయ్యేలా పట్టుబట్టాలి
- టెలీకాన్ఫరెన్స్‌లో టీడీపీ అధినేత చంద్రబాబు సూచనలు
అమరావతి(చైతన్యరథం): రాష్ట్ర ప్రజలు ఐదేళ్ల పాటు పడ్డ కష్టాలకు మంగళవారంతో అడ్డుకట్ట పడబోతోందని టీడీపీ అధినేత నారా చంద్రబాబు నాయుడు అన్నారు. ఎన్డీఏ కూటమి విజయం కోసం ఎన్నికల్లో కష్టపడి పని చేసిన ప్రతి ఒక్కరినీ మనస్ఫూర్తిగా అభినందిస్తున్నానన్నారు. మంగళవారం ఎన్నికల కౌంటింగ్‌ జరుగుతున్న నేపథ్యంలో కౌంటింగ్‌ కేంద్రాల్లో ఏజెంట్లు అప్రమత్తంగా వ్యవహరించాలని, లెక్కింపులో ఏ అనుమానం వచ్చినా వెంటనే రిటర్నింగ్‌ అధికారి (ఆర్వో)కి ఫిర్యాదు చేయాలని సూచించారు. కూటమి కౌంటింగ్‌ ఏజెంట్లతో సోమవారం టెలీకాన్ఫరెన్స్‌లో మాట్లాడిన చంద్రబాబు పలు సూచనలు చేశారు. ఐదేళ్లు ఎంతో కష్టపడ్డారు….ఈ కష్టాన్ని, శ్రమను మరో 24 గంటల పాటూ కొనసాగించాలి. ఎన్నో విపత్కర పరిస్థితులను ఎదుర్కొని నిలబడ్డాం. పోస్టల్‌బ్యాలెట్‌ ఓట్లపై రాద్ధాంతం చేయాలనుకున్న వైసీపీకి సుప్రీంకోర్టులోనూ మొట్టికాయలు తప్పలేదు. ఓటమిని జీర్ణించుకోలేని వైసీపీ కౌంటింగ్‌లో హింసకు పాల్పడేందుకు కుట్రపన్నుతోంది. కూటమి కౌంటింగ్‌ ఏజెంట్లు సంయమనం కోల్పోవద్దు. నిబంధనల మేరకే కౌంటింగ్‌ జరిగేలా పట్టుబట్టాలి. కౌంటింగ్‌ ఏజంట్లు ఎలా వ్యవహరించాలో ఇప్పటికే శిక్షణ ఇచ్చాం. ఏజెంట్లు నిర్దేశిత సమయానికి కౌంటింగ్‌ కేంద్రాలకు వెళ్లాలి. మొదట పోస్టల్‌ బ్యాలెట్‌ ఓట్ల లెక్కింపు…తర్వాత ఈవీఎం ఓట్ల లెక్కింపు జరుగుతుంది. అన్ని రౌండ్లు పూర్తయ్యే వరకు ఏజెంట్లు ఎవరూ బయటకు రావొద్దు. కంట్రోల్‌ యూనిట్‌ నెంబర్‌ ప్రకారం సీల్‌ను ప్రతి ఏజెంట్‌ సరి చూసుకోవాలి. ప్రతి ఒక్కరూ 17-సీ ఫాం దగ్గర ఉంచుకుని పోలైన ఓట్లను…కౌంటింగ్‌లో వచ్చిన ఓట్లను సరి చూసుకోవాలి. అన్ని రౌండ్లు పూర్తయ్యాక పోలైన ఓట్లకు, కౌంటింగ్‌లో వచ్చిన ఓట్లకు తేడా ఉంటే వీవీప్యాట్‌లు లెక్కిస్తారు. పోస్టల్‌ బ్యాలెట్‌ ఓట్ల కౌంటింగ్‌కు వెళ్లిన ఏజెంట్లకు ఏ మాత్రం అనుమానం వచ్చినా ఆర్వోకు అభ్యంతరం తెలపవచ్చు. ఆర్వోలకు ఇచ్చిన ఫిర్యాదులపై ఎక్నాలెడ్జ్‌మెంట్‌ తప్పకుండా తీసుకోవాలి. మనకున్న అభ్యంతరాలపై నిబంధనలు పాటిస్తూనే అధికారులకు ఫిర్యాదు చేయొచ్చు. డిక్లరేషన్‌ ఫామ్‌ తప్పకుండా తీసుకోవాలి. అనారోగ్య కారణాలతో ఏజెంట్‌ ఎవరైనా రాలేకపోతే నిబంధనల ప్రకారం కౌంటింగ్‌కు ముందే మరొకరిని నియమించుకునే వెసులుబాటు ఉంది. నిబంధనలు అమలయ్యేలా చూడటంలో ఎవరూ రాజీ పడొద్దు. ప్రతి ఓటూ కీలకమే అనేది ఏజెంట్లు గుర్తుంచుకుని లెక్కింపు ప్రక్రియలో పాల్గొనాలని చంద్రబాబు సూచించారు.
